Hammers sporting director tur Mark Noble

West Ham captain chawl ta Mark Noble chuan inkhelh chawlhsan tawh mah se, football khawvel erawh mangṭha mai a la tum lo a, January 2, 2023 aṭanga sporting director hna chelh ṭan turin West Ham-ah a kir leh dawn.

Hammers-ah chuan Sporting Director hna hi an ruahman thar ve chauh a, Noble hian club manager David Moyes leh board of director-te chu club inrelbawlna hrang hrangah hna a thawhpui dawn a ni.

Noble chuan, "Ka lo kir thei hi ka lawm takzet a, West Ham-a he hna ka chelh thei tur hi ka tan chuan chawimawina ropui tak a ni. Mimal leh professional nihna ang pawhin he hna hian keimahah hmasawnna nasa tak a thlen theih ka ring.

"Tun hnai season hnih liam ta chhung khan hma kan sawn nasa em em a, club-in hma lam a pan zelna kawngah hian a puitu nih ve ka duh a ni," a ti.

Noble hian kum 11 mi lek ni chungin West Ham academy a zawm a, Hull City leh Ipswich Town-ah loan-in a chhuak tih loh chu a professional career chu Hammers-ah hian a hmang zo a ni.

London club tan hian match 550 khelin goal 62 a khungsak a, assist vawi 60 a nei. Season hman zawh takah khan Europa League semifinal hruai thlengin, inkhelh a chawlhsan.

Noble hian inkhelh a chawlhsan hnuah tun nipui khan entertainment, media and sports business leadership course chu Harvard Business School, USA-ah zirin a zo a ni.

Hammers boss Moyes chuan, "West Ham nihphung leh a kalphung hriat kawngah chuan ani aia duhthlan tur ṭha zawk an awm chuang lo. Player a nih laia kan inhrawn aṭang leh, a bik takin Covid-19 vanga hun harsa kan paltlang laia a chet dan aṭangin he hna hi tlin takin a thawk dawn tihah ka chiang a ni," a ti.

West Ham joint-chairman David Sullivan chuan, "Mark hian kum 18 zet club tan rim taka a thawh hnuah chawlh hahdam ve hret a duh a, mahse, hma hunah club hna chelh turin a lo kir leh ang tih hi chu thil chiang sa reng a ni," a ti a, an legend an ko kir thei chu a lawm hle.

Noble hian hriat hlawh viau mah se England tan age level hrang hrangah a inlan tih loh chu international football a khel miah lo a, a pi leh pu aṭangin Republic of Ireland tana khelh theihna dan nei mah se khelh loh a thlang.

February 2017 khan Ireland tana kohna hi a hnar a, Noble hian, "Irish naupang, ṭha taka football khel a, Ireland tana inlan mangphan ṭhin, he ram tana inlan kei aia ngaihlu zawk an awm ang tih ka ring.

"England tan senior team-ah inlan lo mah ila, youth international niin age group zawng zawngah ka khel a, tournament-ah inlanin, hnam hlate ka sa bawk. Chuvangin, Ireland tana inlan mangphan ngai lo kei hi Ireland tan inlan ta ila, Ireland tana inlan châk ngawih ngawih player-in tithei ta si lo se, hrehawm ka ti dawn lutuk," a ti a, international football khelh loh a thlang.