Lianzuala telna India zaninah inlan dawn
Vietnam-a Hung Thinh Friendly Football Tournament-a inlan tura zin mek India chuan vawiin tlai dar 5:30 hian an match hmasa zawk an khel dawn a, anmahni ang thoa mikhual Singapore nen an inkhel dawn.
Indian player 23 zingah Mizo tlangval Lallianzuala Chhangte chu squad-ah a tel a, Mizo awmchhun a ni - Mumbai City forward hi Durand Cup-a top scorer ni hlim a nih avangin bul a ṭan a nih pawhin a mak lo ang.
Mipui 15,000 lenna khelmual, Thong Nhat Stadium, Ho Chi Minh City-ah India leh Singapore hi an intawng dawn a, Eurosport chuan live-a en theih turin a pe chhuak dawn a, online chuan JIO TV-ah a en theih dawn bawk a ni.
Mizo tlangval beiseina
Lianzuala chuan, "Training kan nei tam lutuk hman rih lo a, bul ṭan tur pawh hriatthiam a harsa. Inlante chu kan beisei ve phawt ang chu," a ti a, zanina bul a ṭan dawn leh dawn loh a chian loh thu Vanglaini a hrilh.
Lunglei tlangval chuan inkhel tur thlirlawkin, "Singapore first match kha en ila, kan chesual viau a nih loh chuan kan hneh turah ka ngai. Goal khung hmasak a pawimawh dawn a, ball an hum theih avangin dawhtheihna kan mamawh dawn a ni," a ti.
Japanese coach Takayuki Nishigaya enkawlna hnuaia khel Singapore hian an match hmasa zawkah Vietnam chu 4-0 ngawtin an ngam lo tawh a, India-in an zuam sawt a nih pawhin thil mak lutuk a ni lo ang.
Khaikhinna
Lions (Singapore sawina) hian June thla khan AFC Asian Cup third round qualifier an khel a, mahse, Tajikistan leh Kyrgyzstan hmachhawnin an chak zo lo ve ve a, a tawpah Myanmar chu 6-2 in hneh mah se Asian Cup 2023 an inpetkai zo ta lo.
India erawhin third round-ah hian Cambodia (2-0), Afghanistan (2-1) leh Hong Kong (4-0) hnehin, match thum a zawnin an chak a, Asian Cup khel turin an inpetkai - coach Igor Stimac chu contract pawtsei hlim a ni bawk a, India 'puja' fuh lai tak a ni.
Indian Super League la ṭan lo mah se India squad-a player zingah Durand Cup khel an awm nual a, hei vang hian player-te an in 'fit' ṭha a, Singapore hneh an tum ngam ang - Lions hi FIFA ranking-ah 159-na an ni mek a, India hi 104-na an ni thung.
Mizo tlangval
India tan Lallianzuala'n inkhel bul a ṭan a nih ngat chuan Blue Tigers beiseina innghahna tur a ni dawn - Chennaiyin forward hlui hi Durand Cup khel zo hlim a ni a, match sarih aṭanga goal sarih khungin assist vawi thum a nei.
Stimac-a'n India tan a en kan vang vang hnuah, Durand Cup a kheh ṭhat em avangin Blue Tigers squad-ah Lianzuala a ko kir a, Lunglei tlangval hian Croatian coach rinna tihlawhtling turin theihna a nei sang ve tawk.
Mumbai City forward hian India tan match 15 khel tawhin goal li a khung tawh a, tun season bul a ṭan dan thlir ila, goal khung belh châkin a tuihal ngei ang.
Singapore an ṭha
FIFA ranking enin, team pahnih inthlau mah se, Singapore hian player ṭha tak tak an neih avangin ranking aṭanga teh chi an ni lo - kum 2014-a The Guardian-in khawvel footballer beiseiawm zinga a thlan Irfan Fandi hi en bik sual lo tur a ni.
Thai League 1 club BG Pathum United tana khel centre back hian ram tan match 37 a khel tawh a, kum 25 chauh a la nih bawk avangin a tha a la za reng - tlarhmaa India chhuanvawr Sunil Chhetri ven chu a hna a ni dawn a, kum 38 ni tawh mah se Durand Cup en chuan Chhetri-a'n a thiam a la theihnghilh lo tih kan hmu.
Lianzuala tlan chakna hi Singapore tan chuan hahpui tham a ni dawn a, Liston Colaco che vel pawh buaipui tham a ni leh ngeiin a rinawm - a tawi zawnga sawi chuan Singapore an ṭha a, India tan chetsual theihna tur an ni dawn.
September 24, Inrinni
India 05:30 PM Singapore
April 27, Thawhlehni
Vietnam 05:30 India