August thla tawpah Tour de France

Cycle khalh lama thuneitu sang Union Cycliste Internationale (UCI) chuan August 29 aṭangin Tour de France 2020 tlan ṭan an tum a, inelna hi September 20 thleng neih tur a ni ang.

Inelna hi a tirah chuan June 27 aṭanga July 19 chhunga neih tura tih a ni. Mahse, Covid-19 vangin khawvel a buai a, infiamna zawng zawng pawh chawlh rih vek a ngaih avangin cycle inelna lian pawh hi a hun pangngaia neih theih a ni lo.

France sorkar chuan September thla thleng chu infiamna lama punkhawmna lian a khap a, tun ṭum Tour de France hian Giro d'Italia leh Vuelta a Espana te neih hun tur a nek buai dawn a, inelna pahnih hi October thla a neih tura sawn hlat a ni ve thung.

UCI president David Lappartient chuan, "Kan phak tawk anga ṭha leh fuh tur chuan ruahmanna kan siam. Kan duh ang thlapin inelna a kal thei lo deuh a nih pawhin a hlutna tlahniam chuang si loa neih kan tum," tiin a sawi.