Chak ngei ngei a ngai tawh - Dinthar coach

Mizoram Premier League-a champion hmasa ber Dinthar FC-in tun season match hnih khelh tawh aṭangin point an la hmu lo a, coach Lalhlupuia Sailo chuan chak ngei ngei a ṭul tawh thu a sawi.

Vawiin tlai dar 3:00 hian Maimawms hian Lammualah Bethlehem Vengthlang FC a hma­chhawn dawn a, inkhel hmuhnawm tak a ni dawn.

Mizo hlanga khel BVT hian coach Chawng­thansanga kaihhruaina hnuaiah Chanmari West FC hnehin bul an ṭan a, beiseina sang tak nen Mizoram Police hmachhawn mah se Ṭialthawnga hote lakah point khat bak an hlawh chhuak lo. BVT hian knockout thleng pha turin an elpui Dinthar laka point thum an hlawhchhuah hi a hlu dawn a, chumi tur chuan insiam ṭhat ngei an tum ang.

Dinthar FC-in foreig­ner pahnih mid­fielder Clarence Carter leh for­ward Jackson Victor Ogheneochuku te nei chungin season bul an ṭan a, an elpui Chanmari FC laka goal khata an chak loh hnuah Ramhlun North an hneh lo zui a. Maimawms vanneih ṭum chu ni se match hnih an khelhah hian point hmuh ve ve an phu a, amaherawhchu football chu goal khung tam zawk chungnunna a ni.

Maimawms coach Lalhlua chuan, "Chak ngei ngei a ngai tawh. Player-te pawhin chak duhna rilru an pu a, point thum kan mamawh a ni," tiin Vanglaini a hrilh. Dinthar FC-in Chanmari FC an hneh loh ṭumin an player pahnih hnawhchhuah an ni a, Ramhlun North an khelh ṭumin hnawhchhuah tawk awm lo mah se vanduai ṭum chu ni se kim loa khel thei tur an ni a, team tlo tak an din dawn a nih chuan an nungchang an siam ṭhat a ṭul ang.