Spurs damna Harry Kane

Harry Kane-a goal hnih hmangin Tottenham chuan an mikhual Borussia Dortmund 3-1 in an hneh. Nilaini zan khan Mauricio Pochettino nauten Wembley Stadium-ah Champions League bul an ṭan fuh hle.

England international Kane hian tun hnaiah ram leh club tan a match hnuhnung 22-ah goal 28 a khung thei a, hrem vangin Dele Alli inkhel thei lo mah se South Korea international Son Heung-min chuan German club lakah a theihna a lantir bawk avangin Spurs tan buaina tur a awm lo.

Goal thum

Tottenham hian season hma­sa khan Champions League home match khelh nan Wembley Stadium an hmang, group stage-ah vawi khat bak chakni hmel an hmu lo. Poch-a nauten an khelmuala result ṭha an neih hleihtheih loh kalsan an tum a, an hlawhtling.

Inkhel ṭan aṭangin mikhual Dortmund lamin ball an chang tam a, a hlauhawm zawk erawh Spurs an ni. Minute lina lekah Son-a'n halfway line bul aṭanga ball tlanpuiin keeper Roman Burki thlengin a paltlang phei fai vek a, chiang zetin goal khatna a khung.

Bundesliga club hian mawi taka ball an inpek kual hnuah forward Andriy Yarmolenko hmangin mawi zetin an siphurh an sut, an lawm chhung erawh a rei lo. England international Kane-a'n khelmual sir lamah player pathum a paltlang hnuah an goal hnihna a khung a, Pierre-Emerick Aubameyang-a'n an siphurh a sutna goal erawh off­side tia pawm sak a ni lo - replay ennawn a nih hnuah erawh Ga­bon international hi a offside lo.

Kum 24 mi Kane hian midfielder Christian Eriksen hnen aṭanga a ball hmuh chu lei hrulah mawi zetin a pet lut leh a, Dortmund substitute Mario Gotze laka a foul avangin defender Jan Vertonghen chu hun tawp hma deuhin hnawh chhuah ni mah se inkhel result a thlak danglam phak tawh lo.

Kane a hriam

Feet 6 leh inches 2-a sang Kane hian season thum chhung chu Premier League-ah goal 20 a khung tling thei a, mahse Spurs tan nomawi a pet chhuah loh avangin sawisel a hlawh ṭhin. Season hmasa khan a club hi league lamah pahnihna a nihpui a, tunah chuan Wayne Rooney (2010) hnuah English player zinga a zawna Champions League match thuma goal khung thei a ni ta.

Tun season Bundesliga match thuma goal la chhuah lo Dortmund lakah Kane hian striker puitling a nih zia a lantir chiang hle, defender paltlang turin tharum a ngah a, keeper hmaah a huaisen bawk - a goal khung pahnihte kha 'world class' tia sawi tur an ni.

Spurs hian 2009 League Cup final-ah khan Manchester United chu Wembley-ah goal awm loin an hneh thei a, hemi hnuah match 11 khelin clean sheet an la nei leh lo. Dortmund pawh England-a khelmual hmingthangah hian an vawi hnih len luhna niin an chak lo ve ve. Kum 2013 Champions League final khan Bayern Munich an hneh lo tawh bawk.

Eng nge an sawi?

Spurs boss Mauricio Po­chet­tino chuan, "Dortmund kha team ṭha tak an ni a, chawlhlawk hma khan inkhel an thununin min chhaih buai hle. Chawlhlawk laiin kan tihsual ṭhenkhat kan siamṭha thei. A chang chuan inkhel thununtu ni lo chunga hnehna chan dan kan hriat a pawimawh, ka naute an puitling tawh a ni," tiin a sawi.

Dortmund manager ma­nager Peter Bosz chuan, "Team pahnih khelh duh dan inang, goal nawr ve ve kan intawng a, a vanduai zawkah kan ṭang. Spurs kha team ṭha tak ni mah se kan goal chhuah kha ven theih a ni, tuna kan chak loh avang hian kan khelmuala kan inkhelh hmabak chu a pawimawh zual dawn a ni," a ti.

Ngaihnawm
• Son Heung-min hian Borussia Dortmund a hmachhawn hnuhnung vawi kuaah goal sarih a khung.
• Tottenham hian Wembley-ah match 12 an khelhah ṭum hnih hnehna an channa chiah a ni (D3 L7). Champions League-a an hneh hnuhnung ber chu CSKA Moscow an ni.
• Borussia Dortmund hian Englad-ah match an khelh hnuhnung vawi 10-ah ṭum sarih zet an chak lo (W2 D1).
• Christian Eriksen-a'n kum 2017 chhungin inelna hrang hrangah assists vawi 20 a nei tawh a, European league lian panga a player zingah amah hnaih bertute aiin ṭum sarihin a ngah zawk.
• August thla a goal khung lo Harry Kane hi September thla a Spurs goal paruk zinga pangaah a inrawlh, goal li khungin assist vawi khat a nei.