Real tan Ronaldo

Champions League nomawi kawltu Real Madrid chuan Nilaini zan khan an mikhual Apoel Nicosia 3-0 in an sawp. Zinedine Zidane-a team tan hian Cristiano Ronaldo-a'n goal hnih a khung bakah defender Sergio Ramos chuan goal khat a thawh ve bawk.

Spanish football lama hrem tawk mek Real Madrid forward Ronaldo chu Europe lamah hrem a ni ve lo a, Santiago Ber­na­beu-ah inkhel bul a ṭan. Portugal captain hian mi­nute 12-naah goal hmahruai khungin second half-ah penalty a chhuih lut bawk.

Kum 32 mi Ronado hian Champions League-ah goal 55 khungin record nei ṭha ber a ni. Ronaldo hnung chiahah hian goal 54 khungtu Lionel Messi a awm bawk. Barcelona forward Messi hian Thawhlehni zan khan Juventus lakah goal hnih a khung ve bawk.

Real Madrid manager Zidane chuan, "Cristiano theihna san zia kan hre vek, a vanneih ni chu nise chuan goal li khung thei a ni, khawvelah a ṭha ber," tiin a player duhlai chu a dah sang hle. French manager hian an khingpui chu dahhniam ngawt theih an nih bik loh thu a sawi tel bawk.

Group H-ah Real hian point thum hmuin Totten­ham nen an inzat a, La Liga champion Real Madrid hian goal difference an neih ṭhat zawk avangin hmahruaitu an ni.

Inkhel Results
UEFA Champions League
Maribor 1 - 1 Spartak Moskva
Liverpool 2 - 2 Sevilla
Feyenoord 0 - 4 Manchester City
Shakhtar Donetsk 2 - 1 Napoli
RB Leipzig 1 - 1 Monaco
Porto 1 - 3 Besiktas
Real Madrid 3 - 0 APOEL
Tottenham Hotspur 3 - 1 Borussia Dortmund