Olympic thleng tur Paris leh LA

International Olympic Committee chuan Paris leh Los Angeles te chu 2024 leh 2028 Summer Olympic thleng tur an nih thu a tichiang ta.

Khawpui pahnih hian kum 2024 Olympic thlen an duh ve ve a, an pahnih hian a tawp thlenga inel an ni. Mahse, LA lam hian kum li dang nghah leh an hreh loh thu an sawi hnuhnawh a, IOC lamin khawpui pahnih an inrem a nih chuan a indawt a an thlen tur thu an sawi lawk tawh bawk avangin an inrem thei ta a ni.

French khawpui Paris hian kum 1932 leh 1984 khan Olympic hi an thleng tawh a, 2008 leh 2012 khan a vawi thum nan dil mah se Beijing leh London an tluk lo. Kum 2024 hi Olympic an thlen hnuhnung zawk aṭanga chhutin a kum 100-na chiah a nih avangin Paris tan chuan a lawmawm zual hle ang.

California state chhunga khawpui lian leh hmingthang LA hian kum 1932 leh 1984 khan Los Angeles Memorial Coliseum-ah Olympic hi an thleng tawh bawk, an tan pawh Olympic an vawi thum thlenna tur a ni dawn.

IOC president Tho­mas Bach chuan, "Ram lian tak pahnih aṭang­in khawpui lian leh hmingthang thlan chhuah an ni a, Olympic sulhnu ropui tak awm tawhna hmun a nih bawk avangin infiamna khawmpui lian an thleng leh thei tur hi ka lawmpui hle," tiin a sawi.