Leipzig leh Monaco inhnehtawk
Nilani zan Champions League group stage inkhelah Bundesliga club RB Leipzig chu an mikhual French champion Monaco nen 1-1 in an inhnehtawk a, point khat ve ve an hmu.
Season hmasa Bundesliga pahnihna Leipzig-in Red Bull Arena-ah European football an khelh hmasak ber zan hian forward Emil Forsberg-a'n minute 32-naah goal hmahruai khungin fans a lamtir. Goal a luh aṭanga minute hnih chiah a liam hman tihin Monaco hian striker Youri Tielemans hmangin an sut a, goal dang a luh belh tawh lo.
RB Leipzig coach Ralph Hasenhuttl chuan, "Kan khingpuite kha an goal nawr a nain keini aiin tawnhriat pawh an nei ṭha zawk, chutichung chuan chak zawk nih theihna hun ṭha kan neihte kan chhawr ṭangkai thei lo a ni. Champions League kan vawi khat khelhna a nih avangin ka player tam zawk khan inrintawkna an nei tlem," a ti.
Tuna Leipzig player zingah Emil Forsberg, Jean-Kevin Augustin, Bruma leh Kevin Kampl te chiah hi Champions League tawnhriat nei an la ni. Monaco erawh season hmasa quarterfinal thleng thei an ni thung.
Kum 2009-a din chauh ni mah se Leipzig hian hma an sawn chak hle a, kumin hi an tan Bundesliga season hnihna chiah a la ni. An season hmasa berah Bayern Munich chiah an tluk lo, Germany club tan Champions League match hmasa bera Monaco nena inhnehtawk hi result chhia a ni lo.
Monaco manager Leonardo Jardim chuan, "Hnehna chan tumin Germany kan pan a, kan chak zawh loh vanga indawm kun tur erawh kan ni lo. Season hmasa kan team nen khaikhin tur kan ni lo a, tunah chuan team thar kan indin chho mek a ni. Kan tan chuan season thar apiang hian zinkawng thar kan zawh thar zel a ni," tiin a sawi.
Paris Saint-Germain khuma Ligue 1 champion ni thei Monaco hi tun nipui bazarah an player langsar Benjamin Mendy, Tiemoue Bakayoko, Bernardo Silva ten a nghetin club an chhuahsan a, loan hmangin Kylian Mbappe a chhuak bawk - player hmanthiam sa tel loin season an hmang chho dawn a ni.