Delhi tana khel tur Dutch rawlthar

Dutch rawlthar beiseiawm tia an sawi ṭhin winger Jeroen Lumu chuan Turkish club Samsunspor aṭangin Delhi Dynamos a zawm a, kum 22 mi forward hian Netherlands tan Under 17, 18 leh 21-a lo khel vek tawh a, kum 2012 UEFA European Under-17 Football Championship nomawi an chawi ṭum khan player pawimawh pawl a ni phak.

Lumu hian Dutch club Willem II-ah a career a ṭan a, kum 16 leka upa a nihin a match hmasa ber a khelhsak. Kum 17-a upa a nihin a club tan hian league-ah goal a khung a, Dutch Eredivisie-a Willem II tana goal khung thei naupang ber a ni.

Euro U17-a a chet ṭhat hnuah European club langsar tak tak Arsenal, Manchester United, Manchester City leh Juventus nen pawh sawizawm hial a lo ni tawh a, Hull City leh Derby County-ah trial a lo nei tawh bawk. Mahse, rin loh takin Bulgarian club Ludogorets Razgrad a zawm a, a season khatnaah hian Bulgarian League, Bulgarian Cup leh Bulgarian Super Cup a chawipui nghal.