A tir lam kha a harsa - Arteta

Mikel Arteta chuan Arsenal a zawm tirh khan boruak a harsat thu a sawi a, thil tam tak chu thlun zawm hmasak a ngaih thu a sawi chhuak bawk - tunah erawh Gunners hi an boruak a ṭha viau.

Nikum December thla khan Arteta hi player a nih laia captain dinhmun a chelh tawhna Emirates Stadium-ah manager ni turin a kir, coach an ban tak Unai Emery hmunruak a luah.

Spanish manager Arteta kaihhruaina hnuaiah Arsenal hian match 16 an khel tawh a, vawi riat chakin ṭum ruk chu an khingpuite nen an inhnehtawk; chak loh hi vawi hnih chauh an la nei.

Arteta chuan, "A nihna takah chuan ka hun bul lam kha chu a awlsam vak lo, thil a nih dan tur ang taka ni lo deuh kha a awm nual. Training-na hmun, khelmual leh club thuneitute thlunzawm kha ka hna hmasa a ni.

"Player ka nih lai khan he hmunah hian inpawh tlang takin kan lo khawsa ho tawh a, manager ka nih hnuah pawh midangte chu Arsenal club chhunga awm an nih vanga an vanneih thu leh, hmasawn tur chuan thawhhona ṭha kan mamawh thu ka hrilh," a ti.

Kum 38 mi Arteta hian Covid-19 a kai a, tunah chuan an enkawl dam tawh. North London club player leh hnathawktu dang zawng zawng pawh hri leng an kai em tih endik an ni a, manager bak chu midang kai an awm lo.

Hri leng vanga Premier League an chawlh lailawk hma khan Gunners hi table-ah pakuana an ni mek a, season thara Champions League khel tur pawhin an hmabak a hautak tawh hle; beisei bo erawh a la ni bik lo thung.

Arteta hian inkhelh leh theih tawh a chak a, chutihrualin player leh midangte chu coronavirus chungchanga hriat tur leh zawm ngaite hrilhfiahna neih ṭhat hmasak a pawimawh thu a sawi.

Spanish manager chuan, "Sorkar thupek leh dan zawm ngaite kan zawm ṭha tur a ni, inkhelh leh chu châkawm viau mah se hri leng chungchang midang zirtirna pek hi thil harsa ber a ni rih.

"Hmanhmawh lutuk theih a ni lo, chutihrualin club tin hian inkhelh kan mamawh, chutiang tur pawhin theihtawp kan chhuah vek. Sum leh pai dinhmun siamṭhat nan leh, mipui duh leh mamawh lanchhuahtir turin ball chu kan pet leh ngei a ngai," a ti.