Tlai ni nemah Aizawl FC leh Chanmari West

I League champion Aizawl FC-in Mizoram Premier League Season 6 match thum an khelhah chak an la nei lo a, vawiin tlai dar 3:00 hian anmahni ang bawka point thum hmu Chanmari West nen an inhmachhawn ang.

Red Army vs West Warrior
Aizawl FC-in chak hmel an la hmu lo nachungin tun season hi ṭantu an neih ṭhat ber ṭum a ni a, Red Army hming lem invuah AFC ṭantute hian round thum khelh tawhah thawm an la nei lian ber.

Chanmari West-in ṭantu an nei chhe lo a, amaherawhchu match hmasa pahnihah an chak loh avangin Lamualah an thawm a ring tawk lo. Match thumnaah erawh HC Zarzoliana hote hian Ramhlun North an hneh a, Lammualah an zai rual leh ṭan tawh a, Red Army an elpha ang em tih hi zawhna awm chu a ni.

Harhtharhna tluantling?
Aizawl FC-in Paulo Menezes hnuaia MPL match thum an khelh tawhah chak loh an nei lo a, goal la khung vek bawk mah se an goal khung zat an khingpuiten an khung ve zel avangin chak hmel an la hmu lo.

Portuguese coach hnuaiah Aizawl FC game a mawi a tih hai rual a ni lo. East Bengal aṭanga an koh let David Lalrinmuana'n a thiam zia a lantir leh ṭan tawh a, Chhinga Veng nena an inhnehtawk ṭum pawhin Zemabawk North tlangval hian kut ben pui thamin ṭum hnih Chhingcows tlarhnung a tawn tlang.

Club academy chhuak Jona­than Lalrawngbawla'n league match vawi thum inkhel bul a ṭan aṭangin goal hnih a khung a, Electric Veng rawlthar hi a puitling chho hle. MPL club hi veteran midfielder S. Malsawm­tluanga leh captain Alfred Kemah Jaryan ten an ho ṭha a, tlarhnungah Kareem Omolaja a rintlak bawk.

ZoFooty Statistics thlirna aṭangin Aizawl FC hian MPL match thum an khelh tawhah an khingpui aiin ball possession an ngah zawk vek a, hei hian Portuguese coach hnuaiah pas­sing game an khel tih a pholang.

AFC coach Paulo Menezes chuan, "MPL-ah chak kan la neih loh avangin kan chak ngei ka duh tawh. Kan khelh tawh chinah kan khelh dan lungawi thlak mah se kan result erawh a lawm loh. Point thum kan hmu lohna chhan tam tak hi referee thutlukna vang a ni a, rim taka kan thawhna hi referee thutlukna vangin thlawn lo se ka ti. Keimahni ang bawk hian thawkrim se, hma sawn rawh se chuti lo chu Mizoram foot­ball hmasawnna hian tawp chin a nei ang," tiin Vanglaini a hrilh.

West Warrior lam hi
HC Zarzoliana hian Portu­guese coach Paulo-a'n Mizoram a rawn rah hmain MPL-ah a champion dawn a, he league hi a hrechiang. Chanmari West-in match hnih an chak loh zawn hnuah Ramhlun North an hneh a, he team hi Aizawl FC nen MPL6 match hmasa berah an inhnehtawk.

Chanmari West coach Zara'n an chak lohna a hre chho a, MPL5 best defender H. Lalhlimpuia awm hnuah tlarhnung a phui a, Lalromawia'n starting eleven a chan hnuah an ball sawi danin awmzia a nei a, striker H. Lallianzama pawh ṭum dang zawng aiin a fitness a ṭha bawk.

Aizawl FC an hmachhawn hunah captain Lalnunmawia leh a nau Vanlalthlamuana ten an theihna an pho chhuak thei tawh a nih ngat chuan I League champion hian chak ni hmel hmasa ber hmu loin chak loh ṭum an tawng thei thei bawk.