Sindhu-in Okuhara lakah phuba la

PV Sindhu chuan nimin khan Korea Open hmeichhe final-ah Nozomi Okuhara chu 22-20, 11-21, 21-18 in a hneh a, Indian nula hian World Championship final-a a hneh loh Japanese nula lakah phuba a la. Inelna hi SK Handball Stadium, Seoul-ah September 12-17 chhung khan neih a ni.

Kum 22 mi Sindhu hian Super Series title pathum a lakna chiah a ni a, Korea Open hma hian China Open (2016) leh India Open (2017) ah a champion tawh bawk. Hyderabad nula hi 5 ft 10 in-a sang a ni a, 2016 Olympic-ah khan silver medal a la a, Indian zinga Olympic-a silver medal la thei hmasa ber a ni.

Phuba lakna chu

Glasgow-a neih BWF World Championships final-ah Sindhu hian August thla khan Okuhara hi 19-21, 22-20, 22-20 in a hneh lo. An inhnehtawk em avangin hemi ṭum hian darkar khat leh minute 24 zet an khel.

Thla khat hnuah Sindhu leh Okuhara hi an intawng leh a, Indian nula hi a vannei zawkah a ṭang a, shuttler pahnih hi an intawn tawhnaah vawi li ve ve an chak chiah bawk.

Nimin inkhelah hian Sindhu hian 'cross court backhand' a rawn hmang ngam a, India chhuanvawr hian a la nal zan loh avangin tihsual ngah mah se Okuhara tan harsatna tham a tling. Japanese nula hian set hmasa berah 20-18 in hma hruai hman mah se Sindhu-i'n point li a zawna hmuin a lehthal.

Set hnihnaah Okuhara a chungnung tluan a, set thumnaah erawh Sindhu-i'n bul a ṭan ṭha zawk. Olympic silver medalist hian interval-ah 11-5 in hma a hruai a, amaherawhchu fitness nei ṭha Okuhara-i'n game ṭha taka a khelh avangin nuam sain Sindhu a awm lo.

Okuhara-i'n a hnaih chho zel a, 18-16 a nih laiin Sindhu hian vawi 56 zet rally neihah a chungnung zawkah a ṭang. Japanese nula hian khel ṭha chhunzawm mah se unforced error a neih ngun a tuar a, inkhel hmuhnawm takah Sindhu a vannei ta zawk.

Gopi thukhawchang

India's chief national badminton coach Pullela Gopichand chuan, "Kan duh danin result awm mah se player pahnih te hi an tumruhna avangin fak an phu. World championship final-a an intawn ṭum ang thoin a hmuhnawm a, champion zia dik tak an nei ve ve a ni," tiin a sawi.

Korea Open Super Series - Result Kimchang
Men's singles
Champion : Anthony Sinisuka Ginting
Runner Up : Jonatan Christie
Result : 21-13, 19-21, 22-20
Women's singles
Champion : P. V. Sindhu
Runner Up : Nozomi Okuhara
Result : 22-20, 11-21, 21-18
Men's doubles
Champion : Mathias Boe / Carsten Mogensen
Runner Up : Marcus Fernaldi Gideon / Kevin Sanjaya Sukamuljo
Result : 21-19, 19-21, 21-15
Women's doubles
Champion : Huang Yaqiong / Yu Xiaohan
Runner Up : Chang Ye-na / Lee So-hee
Result : 21-11, 21-15
Mixed doubles
Champion : Praveen Jordan / Debby Susanto
Runner Up : Wang Yilu / Huang Dongping
Result : 21-17, 21-18