Golovkin vs Alvarez Chak zawk an awm lo

Khawvelin nghakhlel takin a thlir a, a beisei ang ngei inhnek hmuhnawm hmuh tur awm mah se result-ah erawh mipui an lungawi lo - Nimin zing khan Las Vegas khawpuiah Gennady Go­lovkin leh Saul 'Canelo' Alvarez te an inhma­chhawn a, chak zawk awm loin an inṭhen.

T- Mobile Arena-a in­hnekah hian judge pa­khat Adalaide Byrd chuan 118-110 in Alva­rez chu chiang taka chak­ah a ngai a, Dave Moretti ngaihdanah erawh Golovkin chu chak zawk niin 115-113 in a chung­­nung zawk a, 114-114 in Dan Trella chuan chak zawk awm loah a ngai thung.

Inhnek chu

Kum 27 mi Saul Alva­rez-a'n inhnek bul a ṭan ṭha zawk a, a hnek rang tak chu kum 35 mi ni tawh Golovkin tan buaina tham a ni. GGG-a'n (Golovkin sawina) theihtawp chhuah­in beih let tum mah se ṭhangthar tha za zawk Alvarez a chungnung.

Mahse, round lina a zo a, round ngana aṭang chuan Golovkin chanpual a ni - Kazakh boxer hian tawnhriat ngah leh kum tam zawk a nih chhawr ṭangkaiin Canelo a chhaih mangang a, round 12 an thleng - round tawp rualin boxer pahnihin chak zawkah an inngai a, thutlukna erawh 'in­hnehtawk' a ni. GGG-a'n WBA, WBC leh IBF title a kawl chhunzawm zel.

Rematch?

Mipuiin Golovkin chu chak zawkah an ngai a, thutlukna puan a nih meuh erawh chuan beisei ang result a ni lo - boxer pahnih an result-ah an lungawi bik lo a, inhnek zawhah 'rematch' an sawi ri ve ve. Golovkin chuan, "Inhnek leh ngei ka duh. Fight ropui tak a ni a, mi zawng zawngin hmuh leh an duh vek. Mahse, judge ṭan bik nei lo hmaah ngei a ngai tawh ang," a ti.

Alvarez chuan, "Kan inhmachhawn leh ngei a ngai a ni. Mipuiin hmuh leh an duh chuan kan ti leh ngei tur a ni. Mahse, kan inhnek leh a nih pawhin hnehna chang tur erawh keimah ka ni tawh ang," tiin Golovkin a vau nghal.

Sawiselna

Australian boxer Jeff Horn laka sawisel hlawh taka lo tlawm tawh Man­ny Pacquiao chuan, "Aus­tralia aṭangin judge an chaw lut em ni?" tiin tih el takin zawhna a siam a, world heavyweight champion hlui Lennox Lewis chuan, "Scorecard awmze nei lo a ni a, ka ngaihdan chuan GGG kha a chak zawk a ni," a ti.

Boxing legend George Foreman chuan, "Boxing-a hnehna chan tak tak nan chuan knockout bawk hi a ngai a ni," tiin scorecard chu a rintlak ngai loah a ngai a, Olympic champion hlui Audley Harrison chuan, "Engvangin nge judge-te hian he infiamna hmai hi an tih balh leh ṭhin?" tiin zawhna a siam bawk.