Chhinga Veng leh coach Sanga te daltu Aizawl FC

MFA Super Cup leh I Day Football champion Chhinga Veng chu coach Lal­sangzuala Hmar hnuaia vawi 14 an chak hnu­ah Zir­tawpni zan khan Aizawl FC nen 1-1 in an inhnehtawk.

Mizoram Premier Lea­gue Season 6-ah Chhing­­cows hian point sa­rih hmuin champion lai Chanmari FC aia goal difference-a an ṭhat zawk avangin hmahruaitu an ni a, an chak kaltluang lai hi I League champion-in titawp mah se coach Sanga hnuaiah hneh loh nei loin match 15 an kal ta.

Goal li

Chhinga Veng stri­ker Malsawmfela'n Lam­muala entu ṭhahnem tak hmaah a thiamna pholang turin hun rei a mamawh lo a, minute sarihna lekah freekick aṭangin a khung. Ramhlun South tlangval hi MPL6-a match thum khelh tawha goal la khung vek awm­chhun a ni a, goal li khung tawhin top scorer a ni mek.

MPL4-a best mid­fielder-a thlan K. Lal-

ṭhathanga'n (Puitea) DSK Shivajians a zawm hnuah pawh a la thiam reng tih pholangin minute 19-naah ding lam aṭanga Rochharzela siam chu box chhung aṭangin a khung. Minute 37-naah Chhinga Veng bawkin hma an hruai a, Vanlallawma cross ball chu AFC de­fender Lalhriatrenga'n an lamah a su lut.

Second half minute lina lekah Jonathan Lal­rawngbawla'n Aizawl FC siphurh sut nan a tauh goal a, Electric Veng tlangval goal khung hi an veng ṭhenawm Chhinga Veng tlangval Rochhara siam sak a ni.

A tawp ta

Chhingcows-in July 5, 2017-ah coach Lal­sangzuala Hmar hnuaiah khel ṭanin September 8, 2017-ah match 14-na khelin Chanmari West an hneh a, ni 65 chhung an khingpui an hneh vek chhung hian MFA Super Cup leh I Day Football-ah an champion.

Amaherawhchu an chak hmasak ber aṭanga ni 72-naah Aizawl FC an hmachhawn a, Sanga hnuaia Chhinga Veng record duhawm tak a tawp. Chhingcows hian chona hmachhawn tur erawh an la nei a, an hmachhawp lian ber chu MPL champion a ni a, Sanga hote hian hneh loh an la tawng lo bawk.

Engtin zel?

Sanga kaihhruaina hnuaiah Chhinga Veng hian MPL club pariat zingah Ramhlun North FC leh Dinthar FC lakah fiahna an la hmachhawn lo a, an khingpui leh hma­­sak ber tur erawh Be­thlehem Veng­thlang FC niin September 19, Thawhlehni tlaiah an inhmachhawn ang.

Chhingcows coach Sanga chuan, "Record lam hi ka ngaihtuah lutuk lem lo, kan defender pahnih (K. Patea leh Zautea) inhliam kan tuar deuh a ni. Chak reng erawh duhthusam a ni a, mahse chak reng hi thil awlsam a ni lo, kan result kan pawm thiam khawp mai," tiin an record tawp chungchang Vanglaini a hrilh.

Chhinga Veng FC-in nasa takin Sanga hnuaia hma an sawn tih lanna chu I League champion hmaah a ni a, Aizawl FC-in an siphurh an sut chiah tihin Red Army ten 'Kawmpani sumtual a zim laiah Chhinga Veng kan nek sawr pawr e' tihin an au rual a, chak zawk awm loh laiin chakah an inngaiah a ngaih theih.

ZoFooty Statistics
Aizawl FC 2 - 2 Chhinga Veng FC
AFC : K.Lalthathanga 19'; Jonathan Lalrawngbawla 49'
CVFC : Malsawmfela 7'; Lalhriatrenga 37' (OG)
MoM : Zothanmawia, CVFC
55% Ball Possession 45%
9 Shots 14
5 On Target 7
2 Yellow Card(s) 2
0 Red Card(s) 0
Powered by Rainbow Multibrand Mobile Showroom