Gareth Barry = 632 not out!

West Brom midfielder Gareth Barry chuan Premier League-a match khel hnem ber vawi 632 inlan thei dinhmun a luah ve ta a, Manchester United legend Ryan Giggs-a record a nih rual - Inrinni zan khan West Ham nen goal khung loa an inhnehtawkna inkhelah a inlan a ni.

Kum 36 mi midfielder hi Premier League match 600-a inkhel bul ṭan thei hmasa ber a ni bawk a, Baggies tan tun season-ah ringawt pawh league match 33 khelh tur a la neih avangin Giggs-a record hi a khum ngei a rinawm hle.

Barry a hlim

English midfielder hian May 2, 1998 khan Aston Villa tan a Premier League match hmasa ber a khel a, hetih hunlai hian kum 17 mi chauh la niin Sheffield Wednesday a hmachhawn. Premier League-a inlan hnem ber record nihrual tur hian kum 19 leh ni 137 a nghak a ni.

Everton leh Manchester City tan pawha lo khel tawh midfielder chuan, "Ka tan chuan hun duhawm tak a ni. 632 chu number tam tak a ni a, heti zat kum chhunga hliam harsatna nei loa ka awm thei hi ka hlim a ni. Engtikah emaw chuan ka boot khaiin he game hi ka la mangṭha ve ang a, ka thil tawn ropui zia hi chu ka la hria ang," a ti.

Palace record

Crystal Palace-in manager thar Roy Hodgson kaihhruaina hnuaiah Inrinni zan khan record duhawm lo an siam - English division sang bera an match hmasa pangaa goal khung miah loa tlawm vek hmasa ber ni turin Inrinni zan khan an mikhual Southampton chu 1-0 in an ngam lo a, goal khungtu hi Steven Davis a ni.

Eagles (Palace sawina) hian Frank de Boer hnuaia an match hmasa pali an tlawm hnuah Dutch coach hi banin a aiah Hodgson an lalut a, danglamna a la thlen thei chuang lo. Palace hmabak a hautak hle - league match thumah a zawnin Manchester City, Manchester United leh Chelsea an hmachhawn dawn.

Magpies harhna

Newcastle United-in an league match hmasa pahnihah hnehna chang zo lo mah se match thum a zawnin an chak ta - an mikhual Stoke City chu 2-1 in an hneh a, Magpies tan hian captain Jamaal Lascelles leh Christian Atsu ten goal khat ve ve khungin Stoke tana Xherdan Shaqiri goal khungin awm­zia a nei lo.

Magpies manager Rafa Benitez chuan, "Match zawna chak tam hi chuan fan-te an hlim a, Europe thlengin an sawi nghal mai ṭhin. Mahse, kei chuan kan hmabak match zel atan bak ruahmanna ka siam ngai lo. League inelna sang tak a ni a, kan inzir mek zel a ni," tiin ṭawng uan a la hun lo tih a hria.

Inkhel Results
Bournemouth 2 - 1 Brighton & Hove Albion
Crystal Palace 0 - 1 Southampton
Huddersfield Town 1 - 1 Leicester City
Liverpool 1 - 1 Burnley
Newcastle United 2 - 1 Stoke City
Watford 0 - 6 Manchester City
West Brom 0 - 0 West Ham United
Tottenham Hotspur 0 - 0 Swansea City