Match 4 chak zawn thei Inter

Italian Serie A match li khelh tawhah Inter Milan an la chak fai vek. Inrinni zan khan Inter hian an mikhualna ramah Crotone chu si hnih faiin an hneh a, point 12 hmuin league hmahruaitu an ni.

Inter hian point thum hmu turin an nghah rei a ngai hle, minute 88-naah Milan Skriniar chuan goal hmahruai a khung chauh a, nipui tansfer laia Manchester United nena sawi zawm Ivan Perisic-a'n hun tawp rualin an goal hnihna a khung bawk.

AS Roma manager hlui Luciano Spalletti-a enkawl Inter hi awlsam takin an chak bik lo, goalkeeper Samir Handanovic chuan Crotone midfielder Aleksandar Tonev goal khung ngei tur chu ṭha takin a dan sak a ni.

Inter manager Luciano Spalletti chuan, "Perisic hi khelmual chhungah hruaitu pawimawh a ni a, a lakah beiseina kan neih san poh leh a theihna a lantir nasa zual zel ṭhin. League hi a awlsam lo a, chak kaltluan lai chuan kan chak reng mai a, chak loh chhoh pawh thil awm thei a ni. Tuna kan result ang hi kan neih chhunzawm zel ka beisei," tiin a sawi.

Kartawp inkhel dangah season hmasa Serie A pahnihna AS Roma chuan an mikhual Hellas Verona 3-0 in an hneh. Roma tan hian Manchester City striker hlui Eden Dzeko-a'n goal hnih a khung bakah midfielder Radja Nainggolan chuan goal khat a khung ve bawk.