Stadium tharah Atletico Madrid an chak Barcelona tan Paulinho goal khat a tawk

Barcelona player thar Paulinho-a'n Getafe lakah chakna goal khungin a club chu point thum a hmuh pui. Inrinni zan La Liga inkhel dangah Atletico Madrid chuan an khelmual thar Wanda Metropolitano-ah Malaga 1-0 in an hneh bawk.

Mualneitu Getafe lamin Gaku Shibasaki-a goal hmangin chawlhlawk hmain si khat faiin hma an hruai a, second half-ah Ernesto Valverde nauten Denis Suarez leh Paulinho hmangin an changlet a, khualmualah 2-1 in hnehna an chang. Catalan club hian league match li khelh tawhah point an la hloh lo.

Footballer manto ber pahnih­na Ousmane Dembele-a'n Barca tan a vawi khat nan inkhel bul a ṭan a, France international hi malpui hliam vangin thlak a ngai. Bembele anga tho a Catalan club zawm thartu Paulinho chu bench aṭanga tlan luhtir niin Tottenham midfielder hlui hian minute 84-naah Lionel Messi ball pass chu chakna goal ni turin a hlap lut.

Barca manager Valverde chuan, "Getafe tlarhnung an ding khawng ṭha hle a, kan tum ber chu chakna goal khung kha a ni. Skill leh tharum hmanga kan beih hnuah pawh kan hlawhtling mai thei lo a, a tawpah kan mawh channa chu Paulinho khan min pe a ni," a ti. Valverde hian an team chu player mala innghat ni loin chakna goal khung thei an kawl nual thu a sawi tel bawk.

Inkhel dangah Atletico Madrid chuan Wanda Metropolitano-ah a vawi khat nan La Liga match a khel a, inkhel entu fan 63,000 hmaah Antoine Griezmann chuan minute 61-naah goal awmchhun a khung. Diego Simeone-a enkawl Atletico hian tun season match nga khelh tawhah chak loh an la nei lo.

France international Griez­mann chuan, "Khelmual tharah goal hmasa ber ka khung a, goal dang tam takin an zui ngei ka beisei. Thawhlehni khan training kan nei a, fans an awm loh avangin a khawhar thlak hle. Inkhelh tak tak hunah erawh player 12-na an ṭhahnem bawk a, nuam ka tiin stadium ka inkhelh tawhna hmunah chuan a la ṭha ber," tiin mipui 67,703 lenna an stadium thar chu a dahsang hle.