Bethlehem Arsi a êng ta
Nang, FC Bethlehem, Mizoram Premier League club thar, MPL club dangte zîngah in tê ber tawp lo - Zirtawpni zan khan Chawnpui FC 2-1 in hneh ta si.
RG Stadium-a Zote Honda MPL9 inkhelah FC Bethlehemin coach tawnhriat nei ṭha Lalsangzuala Hmar enkawl Chawnpui FC chu Lalbiakdika goal hnih hmangin 2-1 in an hneh.
A goal hma
Bethlehem hi MPL9-a goal khung thei zinga mi an ni a, goal chhuah pawh an awlsam. Chawnpui lakah hian goal an khung hma.
Minute rukna lekah midfielder Lalnunzira ball vawrhluh chu Chawnpui defender-in tauh sualin a cover-tu defender a ti ṭhat tawk lo. BD-a hian Chawnpui tlarhnung tihsual chu remchangah lain box chhungah a khalh lut a, cool takin goal kilah a khung.
Assist ropui
Minute 33-naah BD-a bawk a inlar a, goal khungtu aiin a siamtu Sena Ralte a langsar zawk thung. Sena Ralte hian Isak Vanlalruatkima ball pek chu mawi zetin a volley a, Chawnpui defender pali thlawh kumin BD-a chalah tak a zuk tla.
North Mualcheng tlangval Sena Ralte hian Royal Wahingdoh aṭanga hming chher ṭanin Chennaiyin, DSK Shivajians, Mumbai City, Bengaluru FC, Delhi Dynamos, ATK leh Real Kashmir tan a khel tawh. Heti taka talent nei ṭha Bethlehemin an chang thei hi an vannei a, captain armband a hreng nghal pawh thil mak a ni lo.
BD-a a langsar
Chutihrualin a hmawr bawktu BD-a fak ngei a ṭul. Inter Village Football-ah khan Champhai Zotlang tan a khel a, Lammual emaw RG Stadium emaw thleng lo an tlak tak avangin mi nawlpui chuan an hre hman lo. Mahse, tualchhung football atchilh chinte chuan first division-ah Dinthar FC tana khelh tawh avangin MPL-a a khelh hma pawh hian an hre tawh thung ang.
Champhai Zotlang tlangval BD-a'n hian hattrick siam theihna remchang a nei a, second half-ah box pawn chiah aṭanga a ball chuan goal ban a per. Bethlehem no. 7 hian en zui a hlawh ang.
Chawnpui an ni tlat
Chawnpui hi coach Sanga enkawl an nih miau avangin awlsam taka tlawm chi an ni lo. Minute 53-naah David Laltlansanga'n angle zim tak aṭangin goal a khung. Chanwpui tlangval Avida hi tualchhung football forward ṭha zinga mi a ni.
Sanga hote hian siphurh sut tumin an nawr a, MC Malsawmzuala freekick hmanga an siphurh sutna remchang an hmang ṭangkai thei lo. Avida pawhin goal hnih khung theihna hun ṭha a neih chu a pet na tawk lo bawk.
Engtin zel?
Bethlehem coach Victor Lalbiakmawia chuan, "Bul kan ṭan ṭhat zar kan zo. Kan khelhṭhat ber ni erawh a ni lo. Mahse result duhawm kan neih avangin a lawmawm," tiin Vanglaini a hrilh. FCB-in point thum hlu tak an hlawhchhuah theih chhanah anmahni ṭantute chu a ngaih theih a, MPL9-ah Venghnuai leh Bethlehem te chu ṭantu nei ṭha an ni.