Singapore lakah India chak zo lo
Vietnam-a international friendly match khel tura thang mek India chuan an match hmasa berah hnehna an chang zo lo a, Singapore nen 1-1 in an inhnehtawk - chak beisei India tan result ṭha a ni lo.
Singapore tan hian Ikhsan Fandi chuan minute 37-naah goal hmahruai a khung a, Ashique Kuruniyan chuan first half tawp hmain Blue Tigers si phurh a sut thei a, a team erawh a 'comeback' pui zo ta chuang lo a ni.
Ashique-a goal a luh theih nan India captain Sunil Chhetri assist sawi hmaih a thiang lo a, kum 38 tling tawh mah se Blue Tigers striker chhuanvawr hi India tan innghahna a la ni reng.
India coach Igor Stimac-a'n Lallianzuala chu squad-ah ko mah se Mizo tlangval hian inkhel bul a ṭan lo a, minute 90-naah Croatian coach-in luhtir mah se Lianzuala tan thil thlak danglam turin hun a tam tawk tawh lo.
Vietnam-in 4-0 ngawta an sawp lakah India an chak zo chuang lo a, hmabakah Blue Tigers aia ṭha zawka chhal ngam Vietnam an la awm bawk avangin international break-a mualpho thei dinhmunah India an ding mek.
Chutihrual chuan India vanduaina erawh sawi hmaih a thiang lo - Singapore keeper Hassan Sunny a che ṭha a, Sunil Chhetri leh Anirudh Thapa chance neih a dansakte chu keeper ṭha lo tana dan chi a ni lo a, hetihrual hian Ishan Pandita chuan uiawm takin a thlawh over a, Liston Colaco pawh a vanneih zan a ni lo.
India captain Chhetri chuan, "Kha aia ṭha zawka tih theih tam tak kan nei a, chance kan hlah hnem hle. Keimahni indem viau loin, theihtawp kan chhuah a ṭul," a ti.
Blue Tigers hian Thawhlehni tlai dar 5:30-ah Vietnam hmachhawnin mualneitu team an tawng dawn a, insiamṭhat an mamawh takzet. Chhetri chuan, "Singapore nena an inkhel kan en a, team ṭha tak an ni.
"Vietnam laka beiseina nei tur chuan kan khelh ṭhat hle a ṭul ang," a ti a, Blue Tigers tana match 130 khelh aṭanga goal 84 khung thei Chhetri bawk hi innghanna ni leh turin a rinawm.
Hetihrual hian Singapore laka Lianzuala bul ṭan lo chu vuipui theih tak a ni - Mumbai City forward hian Durand Cup khelh zawh takah khan Maharashtra club tan match sarihah goal sarih khungin, assist vawi thum a nei.
Mahse, Stimac-a'n a la hrawn tam loh player ai chuan a hriatchian sa player-te bawk rin a duh niin a lang a, Thawhlehni zana Vietnam an hmachhawn huna Mizo tlangval inlan dawn leh dawn loh a la hriat lo.