Final lut panga a hriat tawh!

Tata Yodha 4x4 LPS Pro Fight 2022 khelh laiah final khel tur boxer panga a hriat tawh. Inrinni zan khan R. Dengṭhuama Indoor Stadium, Mualpuiah semifinal zan khatna khelh a ni a, a ṭha zual pangaten final an inhlangkai.

Semifinal khel chun hi BoxRec-ah ziah luh an ni tawh a, professional boxing a nih tawh avangin inhnek pawh a hmuhnawm. A hmunah entu an ṭhahnem a, thawm pawh a ṭha thei hle - zaninah pawh a hmuhnawm chhunzawm ang.

Zanin dar 8:00 aṭangin a hmun ngaiah semifinal khelh a ni leh dawn, inhnek panga bawk a awm ang. Flyweight, bantamweight, featherweight, lightweight leh welterweight huang chhunga final khel tur an zawng leh dawn a ni.

September 24, Inrinni Zan Inhnek
Semifinal - Bout 5

Flyweight
Laldinsanga (Lunglei, Ramthar) bt Joseph Lalremruata (Kulikawn)
Technical Knockout (Round 2, 1:33 min)

Bantamweight
F. Zoramchhana (Cherhlun) bt David Laldanmawia (Lunglei Ramthar)
Unanimous Decision (40-36, 40-36, 40-36)

Featherweight
Yuri Lalbiakdika Sanate (Vaitin) bt Lalmuanpuia (Lunglei Luangmual)
Unanimous Decision (40-35, 40-35, 40-35)

Lightweight
Vanlalawmpuia (Khuangthing) bt Stephen Lalramsan Varte (Churachandpur, Manipur)
Knockout (Round 2, 45 second)

Welterweight
Zomuansanga (Khatla South) bt Lalnunzira (Teirei Forest)
Knockout (Round 1, 2:01 minute)
GIG Motors Fighter of the Night: Laldinsanga (Lunglei, Ramthar)

Zanin Inhnek Tur
Semifinal - Bout 5
Flyweight
C. Zosangmawia vs Samuel Lalthlamuana

C. Zosangmawia, Chaltlang
Kum 25; Weight 49.10; Height 5'4"; Reach 5'7"
Kum 2019 LPS Pro Fight-ah quarterfinal thleng tawhin, championship kal mekah vawi li a chak tawh. Round of 16-ah split decision-in PC Lalrinnunga (Mamit Venghlun) a hneh hram a, a hnuah awlsam zawkin Vanlalmawia (Khuangleng) lakah a chak.

Samuel Lalthlamuana, Saitual
Kum 18; Weight 49; Height 5'4"; Reach 5'6½"
Mizo rawlthar beiseiawm zinga mi Saitual boxer hian vawi nga khel tawhin theihna ṭha tak a nei tih a lantir. Quarterfinal-ah tawn hriat nei ṭha leh amah aia kum 10-a upa Lalchhuanmawia (Reiek) a hneh, a hmain Mamit Venghlun boxer ṭha C. Lalchhanhima a hneh bawk.
Super Bantamweight

Lalpektluanga vs Lalrinngheta

Lalpektluanga, Darlawng
Kum 21; Weight 54.10; Height 5'4½"; Reach 5'8½
Boxing inelnaa a tel vawi khatnaah professional luhchilh turin semifinal a thleng. A khelh hmasak berah fiahna tling inhnek hmachhawnin Pro Fight-a tawn hriat nei pangngai tak J Lalhruaitluanga (Ramthar) a hneh. Zorammawia Renthlei (Durtlang) leh Khawpuimawia (Hortoki) lakah harsatna lian tawk zui lovin a chak bawk.

Lalrinngheta, Tuipui
Kum 20; Weight 53.7; Height 5'6½"; Reach 5'10"
Seeded boxer zinga mi Tuipui tlangval hian vawi hnih khel tawhin, T. Lalhriatpuia (North Tinghmun) leh Lalrindika (North East Khawdungsei) a hneh a, a inhnek hnuhnun berah GIG Motors Fighter of the Night-a thlan a ni. Mizoram aiawha vawi hnih khel tawh hian professional bul a ṭanna a ni ang.
Super Featherweight
H. Lalnunhlima vs Lalrosangzuala

H Lalnunhlima, Tuipui
Kum 19; Weight 57.30; Height 5'5½"; Reach 5'7½
Tuipui rawlthar hian quarterfinal-ah amah aia sang leh ban sei C. Lalhruaitluanga (Cherhlun) a hneh. Tunah hian amah ang bawka seeded boxer nen an intawng dawn. Mizoram aiawha vawi thum feh chhuak taw a ni a, an inhnek hi a hmuhnawm ang.

Lalrosangzuala, Chaltlang
Kum 23; Weight 58; Height 5'7½"; Reach 5'8"
Boxer 210 chuang zinga mit la ber pawl a ni a, a bitum a knockout ve ve. Fighter of the Night lawmman vawi hnih dawng thei awm chhun a ni rih bawk. A kutthlak a nain a khel a nghet a, professional a luhchilh tura a kalkawngah professional boxer ṭha ni awm rengin a thiam.

Super Lightweight
Lalruatzela Hauzel vs HC Lalramfela

Lalruatzela, Mission Veng
Kum 21; Weight 62.50; Height 5'5½"; Reach 5'6½"
Boxing inelnaa a tel hmasak ber ni mah se a mikhual lo. Vawi hnih a khelh tawhah Babusen Ranglong (Assam) a knockout hnuin seeded boxer zinga mi Lalremsanga (Lungleng I) lakah chiang takin a chak zui, a khel a hmuhnawm thei hle.

HC Lalramfela, Chawngtlai
Kum 27; Weight 62.60, Height 5'5"; Reach 5'7
Kum 2015 Pro Fight champion Chawngtlai chhuanvawr hian a hma a ding a piang a ngam em em vek, a bitumte a knockout ve ve. Professional boxing vawi thum a khelh tawhah chak vekin knockout-in tum hnih a chak.

Super Welterweight
Lalmawizuala vs C. Lalhruaitluanga

Lalmawizuala, Chaltlang
Kum 22; Weight 69; Height 5'8"; Reach 5'10½"
Boxing inelnaa a tel hmasak berah Lalhruaisanga (Darlak) leh David Ramfangzauva (Khatla East) hneh zawnin semifinal a lut a, amah ang bawka tawn hriat tlachham lakah a tha tawk tih a lantir. Professional huanga sulhnu nei tha tak nen an intawng dawn, ralthuam ṭangkai a kuttum vei lam a pawimawh dawn.

C. Lalhruaitluanga, Chawngtlai
Kum 25; Weight 69.30; Height 5'9"; Reach 5'10½"
Professional boxing vawi thum a khelh tawhah chak vekin Lalmawizuala a hneh a nih chuan khelh li a chak zawn thei dawn. Championship kal mekah vawi hnih khel tawhin chiang takin a chak.