Mittui nen Federer a liam

Roger Federer chuan mittui nen professional tennis a mangṭha a, player ropui leh danglam bik a nih avangin a hun hnuhnungah hian a player puite pawhin ui tih hriat takin an thlah. Ni e, Roger Ropuia chu a her liam ta vung vung mai!

Laver Cup bak chu Federer-a'n tennis a khelh tawh loh tur thu a sawi a, khawvel a deng chhuak nghal. Season dang zawng aiin Laver Cup hian ngaihven a hlawh phah a, khawvelin a ngaichang ṭhup a ni ber.

Inelna ṭan hmain Federer hian, a elpui ropui ber leh a ṭhianpa ni bawk Rafael Nadal tena ṭan dun a duh thu a sawi a, hliam dam chiang lo a nih avangin, "Ka inkhel tlan thei lo a nih pawhin ka theih chen chen ka khel ang," tiin a sawi lawk.

Zirtawpni zan khan Laver Cup chu khelh niin, Team Europe tan Federer leh Nadal te doubles match khel turin an rawng ding chhuak. Anni pahnih hi Team World tana ṭangdun Jack Sock leh Frances Tiafoe te lakah 4-6, 7-6 (7-2), 11-9 in an chak lo.

London khawpuia inelna hi a hmunah pawh entu an tam. Federer hi a nupui Mirka leh a fate paliin a hmunah an ṭawiawm a, a nu leh pa Robert leh Lynette te an awm bawk - a chevel apiang chu fans lamin thawm ring takin an lo au dur dur zel.

Kum 41 mi Federer chuan, "Ka nupui Mirka hian engtik lai pawhin min thlawp, hun rei deuh tawh takah khan chawl turin min ti ni se la chuan ka chawl tawh hial ang, mahse tun thleng hian ka duh anga ka beih hi a remti.

"Ani hi rei tak chhung tennis ka khelh theih chhan pakhat chu a ni," tiin a nupui chungah lawmthu a sawi a, tennis match an khelh zo hi Nadal nen court sirah an ṭhu, an mittui an dang zo lo - an vanglai an ngaihtuah ang a, an lung a leng ve ngei ang.

Laver Cup hi mipa tennis team hmanga inelna neih a ni a, nizan khan match an khel zo - result erawh kan hre vek hman lo. Europe khawmualpui aṭanga player thlan bikte chu 'Team Europe' an ni a, khawvel hmun dang zawnga mi te chu 'Team World' an ni.

Team Europe tan Novak Djokovic pawh a inlan. Serbian star hi singles leh double huangah a inlan. Wimbledon hnua a match khelh lehna hmasa ber ni mah se a buai chuang lo, a match khelh pahnihah a chak nghal ve ve.

Grand Slam vawi 21 champion tawh Novak hian US Open semifinalist Frances Tiafoe chu 6-1, 6-3 in a hneh a, world number 1 hlui hian Team Europe chu 8-4 in hma a hruai pui, tun hnaiah inkhel tam lo mah se a khelh chhunah a ti ṭha thei hle.