Inkhel turin Aston Villa an inpeih

Premier League table-a a hniam ber dawta awm lai Aston Villa chuan league khelh chhunzawm an duh a, an manager Dean Smith chuan inelna hmachhawn leh theih hun an nghahhlelh thu a sawi.

Covid-19 vangin EPL hi an chawl lailawk mek, an chawlh hma an match hnuhnung paliah Villa hi an chak lo vek. Match 28 khelh tawh chinah point 25 an nei a, an mahni aia match khata khel hnem zawk 17-naa awm Watford an phak lohna chu point hnih chauh a ni.

Hri leng vang hian Dutch League leh French Ligue 1 te chuan season an ti tawp fel der tawh. Premier League hi an beisei dan chuan June 8 vel aṭanga khelh chhunzawm leh theih an in ring, club ṭhenkhat chuan training pawh an zawm leh tawh.

Aston Villa manager Dean Smith chuan, "Ruahmanna siam lawk theih a ni lo a, tum leh ruahmanna mumal awm hlei thei lo chunga inkhelh ngai a nih dawn avangin a awlsam dawn lo hle. Ka ngaihdan chuan season hi a bul aṭangin kan khel leh ni dawn maiin ka hria. 

"Season hi kan ṭan leh a nih chuan a thawh hnihna angin a ngaih theih dawn, tun hma lam aia ṭha leh nuam zawk a nih pawh beisei ang. Keini lam chuan league khelh zawh theih hi kan la beisei," tiin a sawi.

June thlatir lama league an khel zui dawn a nih chuan May 18 vel aṭang tal chuan training pangngai an neih a ngai dawn, tunah chuan club tlem zawk chauhin training hi an la zawm thei rih.

British prime minister Boris Johnson chuan Pathianni hian an ram kalphung turah thu a sawi dawn. Inkharkhipna ṭhenkhat an thlahdul rin a ni a, hri leng ziaawmna ram peng/bial hmun 

ṭhenkhatah chuan zalenna an neih zau zual deuh theih tawh a beiseiawm.

Villa manager Smith chuan, "Inkharkhip hnua kan awmdan tur hi sawi lawk theih a ni rih lo. Ka sawi theih chhun chu ka player-ten inkhelh an chak leh tawh a, club lam pawhin a hma thei ang bera training kan neih theih nan hma an lak ka beisei.

"Inkar hlat deuh taka awm chunga training neih a ngai a nih pawhin kan hrethiam tur a ni ang. Inkhelh kan duh a, chutih rualin mihring hriselna leh himna ti chhe khawp chuan a ṭha kan ti chuang lo," tiin a sawi.

Kawng an dap

Kar hmasa khan Premier League club hruaitute an inhmukhawm a, season hman lai chu khelh zawh ngei duh mah se eng tianga kalpui tur nge tih an sawifel thei lo. An khel zui a nih pawhin a hmuna entu an awm theih a rinawm loh.

Match khelh hmabak la awm zawng zawng hi 92 a ni, inkhelh hmain player leh coaching staff chauh pawh hri lakah an him em tih endik zel a ngaih dawn avangin test 40,000 vel chu neih a ngai dawn tihna a ni bawk.

Ruahmanna pakhatah chuan hmun khatah chauh match zawng zawng khelh zawh vek tura tih chhin a awm. Mahse, he thuah hian club an inlungrual dawn lo; Brighton chuan hetiang ruahmanna hi an thlawp loh thu an sawi ngal.