Number 9 nih nuam titu Richarlison

Tottenham Hotspur forward Richarlison-a'n Brazil tan jersey number 9 a ha a, goal hnih a khung bawk. South American ram hian Inrinni zing khan nuamsa takin Ghana 3-0 in an hneh.

Brazil coach Tite-a'n Richarlison chungah rinna a nghat a, tlarhma laiah a tlan tir, an duh leh beisei ang ngeiin goal pawh a khung. World Cup-ah tu ber nge ram tan khel dawn la chiang lo mah se, friendly match lama chet ṭhat hi a pawimawh.

Richarlison chuan, "Coach leh fans lamin ka chungah rinna an nghah ngam ngei ka beisei, a chhan chu hun ṭha ka neih chuan goal hi ka khung ve zelin ka hria. Jersey number 9 hak nuam ka ti a, a mawhphurhna pawh ka hlen vein ka hria," tiin khelhna hmun chan a inbeisei hle.

Brazil hian Thawhlehni zanlaiah Tunisia nen friendly match an khel leh dawn. World Cup an match hmasa ber atan November 24-ah Serbia nen an inkhel ang.