Inenchhin hun a zo tawh - Flick

Germany-in Zirtawpni zan khan Hungary 1-0 in an hneh lo a, Nations League playoff an khel thei dawn lo. Zanin dar 12:15 hian Wembley Stadium-ah an hmelma England an hmachhawn dawn. Three Lions hian chak an la neih loh avangin League B-ah an relegate chiang tawh.

Hungary laka an chak loh hi Flick-a hnuaia an tlawm hmasak ber a ni. FIFA World Cup khelh nan ni 55 chiah a awm tawh avangin German coach hi a thinur hle. Flick chuan, "Chhuanlam siam kan tum lo. Thil thar enchhin ka duh a, a hlawhtlinna kan hmu lo. Tun aia ṭha daih khan kan khel thei. Tunah chuan in enchhin hun a zo tawh," tiin a sawi a, player-te chu fimkhur turin a chah bawk.

Germany hian Covid-19 kai vangin captain Manuel Neuer leh midfielder Leon Goretzka te an chhawr thei lo a, Flick hian Oktoberfest vangah a ngai. Hmalam hun sawi zuiin Bayern Munich manager hlui chuan, "Player zawng zawngin chance an nei vek a, uluk takin an theihna kan thlir a ni," tiin bench-a a awm player-te pawhin chance an la neih vek tur thu a sawi thung.

Germany hian Lukas Nmecha chu khup hliam vangin an chhawr thei dawn lo a, hrem vangin Real Madrid defender Antonio Rudiger a inlan thei dawn lo. Flick-a hote hian Gareth Southgate-a hote an la talbuai zawk.

England hian Italy 1-0 in an hneh lo a, hemi hma hian Hungary lakah 4-0 in an tlawm. Three Lions chak hnuhnun ber chu kumin March 30-a Ivory Coast 3-0 a an hneh daih tawh kha a ni. Southgate chuan, "Kan dinhmun a ṭha lo a, keipawhin kan awmna hi ka pawm a ngai. Chutihrualin World Cup-a England hruai tur chuan ka ṭha tawk. Hlauhthawnna tur a awm lo," tiin a sawi a, a ṭawngkam hman danah pressure a awm tih a hriat theih.

Three Lions hian match hnuhnung pangaah goal khat chauh an khung a, goal sarih an chhuah. Tlarhnung lama awm Harry Maguire leh a hote bakah tlarhma lama awm Harry Kane leh a hote tan insiamṭhat a ṭul ve ve.