Portugal chak, Spain chak lo

Inrinni zan Nations League inkhelah Portugal-in Czech Republic 4-0 in an hneh a, Switzerland lakah Spain 1-2 in an tlawm thung. Group 2 aṭangin playoff khel tur a chiang ta lo. September 27, Thawhlehni zan hian point 10 hmu tawh Portugal leh point riat hmu tawh Spain ten playoff khel tur an zawng ang.

United an langsar
Portugal-in khualmuala Czech Republic an hnehna kawngah Manchester United player-te an che ṭha hle. Portugal tan United wing back Diogo Dalot-a'n goal hnih a khung bakah Bruno Fernandes-a'n goal khat a khung bawk. Liverpool forward Diogo Jota-a'n goal lina a khung a, he goal pawh hi United forward Cristiano Ronaldo siamsak a ni.

Portugal hi chak nuamsa viauin lang mah se 2-0 a nih hnuah Ronaldo handball vangin penalty an chawi a, Czech forward Patrik Schick-a'n a pet over. Second half-ah Czech an tho chhuak tawh lo a, Portugal-in goal hnih an khung belh ta zawk.

Spain daltu Swiss
Spain-in Portual an hmachhawn hmaa dinhmun ṭhaa awm turin Switzerland an hneh a ṭul a, amaherawhchu besei ang result an hlawh chhuak lo.

Switzerland-in Man City defender Manuel Akanji hmangin first half-ah hma an hruai a, second half-ah Jordi Alba hmangin Spain-in siphurh an sut.

La Roja mipui au thawm pawh a reh hmain Switzerland-in mualneitu tlarhnung Xherdan Shaqiri hmangin an rum ṭhaih. Minute thum hnuah corner kick aṭang bawkin Switzerland-in chakna goal an khung a, buai nuai karah Breel Embolo-a'n a khung.