India kuta innghat Cricket South Africa

Cricket South Africa (CSA) CEO Dr. Jacques Faul chuan India-in August thlaa T20 khel tura an tlawh lo a nih chuan sum ṭhahnem tak an hloh tur thu a sawi.

Dr. Jacques Faul chuan, "August thlaa India leh South Africa-in T20 match thum an khelh tur hi kan sum dinhmun siam ṭhat nan a pawimawh takzet. India hian Covid-19 vanga rawn kal an ṭhulh a nih chuan CSA chuan nasa takin a tuar dawn," tiin India kuta an innghah thu a sawi.

Cricket khawvelah India an lian a, an inkhelh tawhnaah sum a tam ṭhin. Faul chuan sawi chhunzawmin, "Entu awm lo pawhin khel ila, sum hmuh tur a tam. Gate entry aṭanga pawisa lut hi 5% aṭanga 10% chauh a ni a, sum hmuhna tur dang hi a la tam a ni," tiin inkhelh theih ngei ni se a duhthu a sawi a, chutihrualin zin vei vah a harsat avangin inkhel lo thei dinhmuna an din thu a sawi.