Pathianni zanah Premier League tawp dawn UCL khel tur : United/Chelsea/Foxes?
2019-20 Premier League season chu Pathianni zanah khelh zawh a ni dawn a, match 10 khelh hmabak chu a rualin zan dar 8:30-ah khelh a ni ang. Champion hriat tawh mah se Champions League leh Europa League khel tur bakah relegate tur a la hriat kim loh avangin a tawp kharna a hmuhnawm dawn.
Leicester Vs Man United
King Power Stadium-a Leicester City-in Manchester United an mikhual tur chu ngaihven hlawh ber a ni dawn. United hian Southampton lakah an goal neih an humhim theih loh avangin point hnih an chan a, hemi hnu hian khelmualah beisei an pha lo chhunzawm bawk.
Covid-19 vangin inkhel a zawn a, FA Cup vangin Man United an hah phah sawt bawk. Ole Gunnar Solskjaer naute an chau tih a lang a, an khingpuite aia hahdamna hun an nei tlem ṭhin chu harsatna siamtu a ni a, Leicester nen pawh a danglam dawn lo.
West Ham nen an inkhelh ṭumin United-in thahrui an nei tlem tih a lang a, hun tawp lamah chak duhna thinlung an lantir thei lo. Solskjaer-a'n rin bik 11 a nei a, chung zingah chuan Luke Shaw a inhliam avangin tlarhnung a nghin phah.
Norwegian manager Solskjaer chuan, "Leicester hmain ni thum chawlhna hun kan nei a, 100% in ngai kan awh hman ang. Dinhmun ṭha takah kan ding," tiin a sawi a, UCL khel turin point khat chiah a ngai tawh. United-in defensive in an khel thei a, an ṭhatna counter attack-ah an innghat thei ang.
Chutihrualin Leicester City hi an muala khel tur an ni a, Premier League top scorer Jamie Vardy kawltu niin goal khung tam lamah Manchester City leh Liverpool chiah an tluk lo. United tan ngaih ṭha taka awm theih a ni lo a, an vanneihna erawh Foxes-in Ben Chilwell leh James Maddison bakah Caglar Soyuncu te an chhawr thei dawn lo.
Chelsea Vs Wolves
Chelsea-in an match hnuhnung berah Liverpool hneh lo mah se Frank Lampard-a hote dah hniam theih an ni lo. Anfield Stadium-a goal thum an chhuah hnuah an beidawng lo a, American star Christian Pulisic luh hnua inkhel danglam theihzia hmutute chuan London club-in Champions League an khelh ngei an ring ang.
Amaherawhchu Blues hi United ang thoa FA Cup khel an ni a, midfielder pawimawh N'Golo Kante dinhmun chiang lo nen Stamford Bridge-a inkhel tur ni mah se Wolverhampton Wanderers hmachhawn tur an nih avangin point khat hmuh a awlsam dawn lo. Wolves hian Nuno Espírito Santo hnuaiah game mawi an khel ṭhin a, Joao Moutinho-a'n inkhel a kaihruai a, Adama Traore leh Raul Jimenez te hmanga chak an tum tur chu a hmuhnawm dawn.
July 22, Nilaini
Liverpool 5 - 3 Chelsea
LIV : Naby Keita 23'; Trent Alexander-Arnold 38'; Georginio Wijnaldum 43'; Alex Oxlade-Chamberlain 84'
CHE : Olivier Giroud 45+3'; Tammy Abraham 61'; Christian Pulisic 73'
Manchester United 1 - 1 West Ham United
MAN : Mason Greenwood 51'
WHU : Michael Antonio 45+2' (P)
July 26, Pathianni
Leicester City 8:30 PM Manchester United
Chelsea 8:30 PM Wolverhampton Wanderers
Crystal Palace 8:30 PM Tottenham Hotspur
West Ham United 8:30 PM Aston Villa
Arsenal 8:30 PM Watford
Everton 8:30 PM AFC Bournemouth
Newcastle United 8:30 PM Liverpool
Manchester City 8:30 PM Norwich City
Burnley 8:30 PM Brighton & Hove Albion
Southampton 8:30 PM Sheffield United
Champions League
Premier League : Champions League-ah team pali an thawh thei.
1 Liverpool : Premier League-ah an champion a, Champions League khel turin an tling tawh.
2 Manchester City : Premier League-ah pahnihna a ni a, UCL khel turin an tling tawh. Pep Guardiola hote hi League Cup-ah an champion a, UCL Last 16 first leg-ah Real Madrid 2-1 in an hneh a, Etihad Stadium-ah second leg an khel leh dawn.
3 Manchester United : Leicester City an hneh chuan pathumnaah an awm chiang a, an inhnehtawk a nih chuan palina chinah an awm chiang. Foxes hneh lo chunga UCL khel tur chuan Chelsea-in Wolves an hneh loh a ngai thung.
4 Chelsea : Wolverhampton Wanderers laka point an hmuh chuan UCL an khel ang. Wolves hneh lo chunga UCL khel tur chuan United-in Foxes an hneh sak a ngai thung. Frank Lampard-a hote hian Wolves hneh loin panganaah an awm a nih chuan season thara Champions League khel turin season kal laiah champion a ngai. Amaherawhchu first leg-ah Bayern Munich 3-0 zeta Stamford Bridge-a an hneh loh avangin European champion erawh a beiseiawm loh.
5 Leicester City : UCL khel turin Man United an hneh ngei a ngai. Chutihrualin United nen an inhnehtawk chunga UCL khel tur chuan Wolves-in Chelsea an hnehsak a ngai thung. Brendan Rodgers hote hi an chak lo a nih erawh chuan UCL khelh beiseina a tawp.
Europa League
English club tan Europa League-ah quota pathum a awm. Premier League pangana bakah FA Cup leh League Cup champion tan a ni. League Cup champion Man City-in UCL an khelh dawn avangin league-a paruknain Europa League an khel ang. FA Cup final khelh a la ni lo a, Chelsea an champion chuan league-a pasarihnain Europa League an khel thei dawn, Arsenal an champion erawh chuan league-a parukna thlengin an khel ang a, Europa League-ah Gunners an inlan ang.
Manchester United, Chelsea leh Leicester City zinga tu emaw berin Europa League an khel ang.
6 Wolverhampton Wanderers : Europa League nemnghet turin match hnuhnung berah Chelsea an hneh ngei a ngai. Blues nen an inhnehtawk erawh chuan Tottenham Hotspur-in Crystal Palace lakah point khat aia tam lo an hmuh a ngai thung.
7 Tottenham Hotspur : Europa League khelh beiseina chhi nung turin Crystal Palace an hneh ngei a ngai. A tawi zawng chuan Spurs hian Wolves aiin point hmuh tam a ngai a, an kutah a awm lo. Jose Mourinho hote hi league aṭanga an tling ta lo a nih chuan Chelsea kutah an innghat dawn. Blues-in FA Cup final-a Arsenal an hneh chuan Europa League an khel tho ang.
Relegation Battle
Norwich City an relegate tawh a; Aston Villa, Watford leh Bournemouth aṭangin pahnih dang an tla hniam leh dawn.
17 Aston Villa : Villa tan Premier League khel zel turin West Ham United an hneh a ngai a, chutihrualin goal khat chauha an hneh a, Watford-in goal thuma Arsenal an hneh chuan an tla thei tho.
18 Watford : Watford-in goal difference-ah Aston Villa an tluk loh avangin Arsenal an sawp a ngai a, hemi a nih avang hian Hammers puihna an mamawh. Hornets tan Premier League khel zel turin Villa aia point hmuh tam a ngai a, Gunners an hmachhawn dawn avangin a awlsam dawn lo.
19 Bournemouth : Bournemouth tan Premier League khel zel turin an match hnuhnung berah Everton an hneh a ngai a, Aston Villa leh Watford te an chak loh a ngai bawk.