World Freestyle Round-Up Skateboarding-ah Mizo rawlthar palina

Khawvel huapa skateboarding inelna ngaihhlut hlawh World Freestyle Round-Up-ah Mizo rawltharin a hming a chher a, amateur huangah Lalnunkima Ralte chu palina a ni phak!

Canada-a neih ṭhin World Freestyle Round-Up hi Covid-19 avangin kum dang anga huaihawt theih a ni lo a, kuminah hian online hmangin inelna hi buatsaih a ni - amateur division, master pro division (kum 40 chunglam), masters amateur division (kum 40 chunglam), rookie division (kum 15 hnuai lam) leh women’s division (hmeichhia kum engzat pawh)-ah te inelna hi neih a ni. 

Tuikual South rawlthar Kima hian amateur huangah inelna hi hmachhawn vein a inlan a, minute khat leh second 30 daih video siam tur a ni a, hei hi judge lamin lo enfiah lehin top 10 an puang zui - top four zingah Kima hming a lang a, an category-ah hian India aṭanga inlan awmchhun a ni bawk. 

Kum 20 mi Kima hian skateboarding lamah sulhnu a nei ṭha hle. Kum 2018 khan Jugaad International skate-boarding competition, Bangalore-a neihah telin category pahnihah pakhatna dinhmun a luah a, Indian zinga he dinhmun hauh thei hmasa ber a ni - kum 2019-ah he inelnaah vek hian inlanin category pathumah a tel a, category pakhatah number 1 dinhmun a hauh nawn. 

Kima tan kum 2018 hi kum ṭha a ni - Shillong khawpuia Prolife Skate Park-in inelna an buatsaihah category li a hmachhawn a, pakhatna a lo ni tawh. World Freestyle Round Up-ah pawh hian 2016-17 (Canada) leh 2018 (Japan)-ah te sawmna a lo hmu tawh a, visa lam harsatna avangin a kal thei lo thung.