'Iron' Mike Tyson 'Baddest Man on the Planet'

'Khawvela pa kawlhrawng ber' tih hialin hminglem vuahsak a ni a, 'Iron' Mike Tyson vanglai hre pha chin chuan he American boxer kawlhrawng hmuhnawmzia leh ropuizia hi an sawi bang thei lo. 

He boxer rothap hian ring chhung leh pawn lam thlengin chanchin a ngah - Evander Holyfield beng a 'seh' mauh maite kha khawvel titi a tling a, kum khat leka pound maktaduai 55 a hmang ral theite kha pui tak a ni!

Sakei chi khat 'Bengal white Tiger' an tih chu in lamah ran angin a vulh a, an inbuan pui ṭhin! A chang leh sa huan (zoo) nghaktu hnenah an zawng lian chi (gorilla) insualpui a phalsak chuan £9,000 pek a tiam thul. 

He boxer hian chanchin maksak ringawt pawh ziah tham fe a nei a, a chanchina ngaihnawm lai ber erawh kum 20 mi lek nia heavyweight champion naupang ber record a siam te, WBC, WBA leh IBF kawnghren kawl hmasa ber a nihnate kha a ni. 

Brownsville, Brooklyn-ah Tyson a piang a, a seilenna hmunah hian damdawi leh silai chu kawngkam dawra chi thlum mum ang maia langsar a ni - chhungkaw pangngai tumahin mahni fate seilenna hmun atan an awt lo. 

Kum 10 mi lek a nihin an 'gang' hmelma chu M1 rifle nen a um tawh a, nitina a hmuh ṭhin chu a nu Lorna leh a bialpa-te insual chu a ni. Tyson chuan, "Hmangaihna inhlan reng chunga ui ang maia thisen inchhuah ṭhinte chu ka thil hmuh ṭhin a ni a, hei vang hi a ni mahna hmangaihnaah hian ka hlawhchham em em," a ti.

Kartin deuh thaw in aṭangin hnawhchhuah a ni a, kum sarih mi a nihin thil sual tam tak a ti tawh. Hetihlai hian misual rawl 'Rutland Road Crew' an tih chu a zawm a, rukruk leh marijuana zuk a chhunzawm reng a, an gang khawi parva a enkawl ṭhin bawk!

Tyson hian a lehkhabu 'Undisputed Truth' tihah hemi chungchang hi ziakin, "Inchung sang taka parva-te nena hun hman chu nuam ka ti em em a, ka puitlin hun thlenga ka tih turah ka ngai hmiah mai a ni," a ti. 

Ni khat chu Tyson-te chenna kawtthlera mi pakhat Gary Flowers leh a ṭhiante chuan Tyson hian parva a nei tih an hria a, an ruksak - Tyson-a hmuh lai ngeiin Gary hian pakhat chu rawng takin a that a, boxer rorum a piang ta!

Ngai teh, sava pakhat chu rorum taka tih hlum a ni a, boxer rothap pek kan ni ta - a ṭhianten a kuttum lek chhuak tura an tihna chu Tyson-a bengah a ri khawk vung vung a, a kut ding lam chuan Flower a deng fuh a, a tlu chiang kher mai. 

Naupang ngawichawi, mi kianga 'bis' zu ve mai ṭhin, rukruk ching kha a kutthlak natzia mitin an hmu a, Brooklyn kawtthlerah chuan zah kai a ni ta. Ni e, chu kawtthlerah chuan mi zah hlawh turin hna ṭha, car mawi leh pawisa tam tak tih lam a ri ve lo - mi huaisen leh insual thiam a ni tur a ni!

Chumi ni aṭang chuan Tyson chuan lo tiduhdah tawhtute chunga phuba lak a ṭan a, a chang leh sum hlawh turin aia u zawk a insualpui a! World heavyweight champion la ni tur a piang. 

Tyson-a'n kum 13 a tlin meuh chuan vawi 30 chuang man a ni tawh a, kum tling lo tanna lung inah khung a ni. Tyson hi a tanna hmuna counselor leh boxer hlui Bobby Stewart chuan boxing programme an hmannaah Tyson a hmu fuh a, boxing coach hlawhtling Svengali Cus D'Amato a hrilh rang hle. 

Cus D'Amato hi boxing coach hlawhtling tak, a hunlaia boxer rothap ni tura Floyd Patterson leh Jose Torres te lo chher chhuak tawhtu a ni a, kum 1979 khan a vawi khat nan Tyson nen an inhmu. 

Kum 70 mi ni tawh Cus hian Catskill Boxing Gym-ah khawlai fighter kha world champion nih tir tumin training a pe ṭan a, Junior Olympic Games 1981 leh 1982-ah chuan Tyson hian gold a la fel der tawh. 

Tyson chuan, "Cus khan Pathian siam mihring zinga fighter rothap ber chherchhuah a duh a, ring chhung a rah hma hauha mipuiten hlau leh ṭih taka an en tur boxer chher puitlin kha a tum ber a ni," a ti. 

Tyson-a nu a thih hnuah Cus hian a fapa angin Tyson a lalut zui a, khawlaia tei mai mai ṭhin rawlthar kha ei tur a pe a, kut lawnga inhnek ṭhin naupang kha awmze nei zawka inhnek turin glove a pe a, Brooklyn kawtthlera 'champ' taka hawi mai a duhtawk lai khan 'khawvel' a beisei pui a ni. 

Mahse, Cus hian Tyson a dam rei pui lo - American figher-in fight a hmachhawn hmasak 11 thleng chu Cus hi a dam a, Tyson hian heng fight 11-ah hian a khingpuite chu a knockout vek!

November 4, 1985-ah kum 77 mi niin Cus D'Amato a thi a, Cus-a'n a beisei anga Tyson champion lai a hmu hman lo. Nov 22, 1986 khan Tyson hian kum 20 leh ni 145 mi lek niin Trevor Berbick chu a hneh a, WBC world heavyweight champion a ni. 

Kum 1990 hma zawng khan Tyson hian WBA, WBC leh IBF heavyweight kawnghren a kawl a, professional fight vawi 37 a hmachhawnah a chak vek a, heng zinga vawi liah chiah hian knockout lohin a chak. 

Mahse pahnih a awm - "Ka hmangaih che, mahse..." tih hi 'mahse' lawmawm loh a ni a, "Mahse, ka hmangaih che," tih erawh 'mahse' lawmawm a ni thung. Tyson-a chanchina 'mahse' lawmawm loh zawk hman a ngai ṭhin hi a pawi lai chu a ni. 

Boxing khawvela rorel a, lal ang maia leng khan a nunah thunun zawh loh a nei. Naupan tet aṭanga a lo chin ṭhan tawh ruihhlo ngainatna chuan a kiansan hleithei lo a, sum tam tak a hnek chhuaka nun nuam a nei ta chungin depression-in kiansan a rel lo. 

February 11, 1990 khan Japan khawpui Tokyo-a inhnek turin Tyson a kal a, harsatna nei loin a hmachhawn tur James Buster Douglas chu a knockout mai tura ngaih a ni - mahse round 10-naah Tyson zawk a tlu a, khawvelin mak tia thlir mai loh chu tih theih a nei lo, a mak a ni!

Douglas nen an inhnek hma hian Tyson hi a rih tur ang aiin a rit a, rei tak amah lo kaihruai tawhtu coach Kevin Rooney a ban bawk. Tyson chuan, "Douglas nen kan inhnek hma khan ka party nasat bakah mipat hmeichhiatna lamah ka tlan nasa hle a ni," tiin a inpuang. 

Douglas laka a tlawm hnuah Tyson hi vawi li inhnek lehin a chak vek a, mahse hemi hnuah hian Desiree Washington pawngsual thubuaiah kum ruk chhung lung in tang tura a chungthu rel a ni. 

August 19, 1995-ah ring chhungah a lo kir leh a, Peter McNeeley a hneh - boxer dang pathum a hneh zui a, WBC leh WBA heavyweight title-te a hlawh chhuak leh a, mahse a nun a sim hleihtheih loh avangin November 9, 1996 khan a career-a a vawi hnih nan tlawm lehin boxer ropui Evander Holyfield a ngam lo. 

June 28, 1997-ah Holyfield hi hmachhawn nawn mah se a beng a sehsak avangin chak lo zawkah puan a ni. June 8, 2002-ah heavyweight tile beiseiin Lennox Lewis lakah chanchin rawn nei leh hat mah se Lewis hian round riatnaah a knockout. 

February 2003-ah Clifford Etienne rawn hneh ve zuai mah se Tyson a tho leh tawh lo - a fight hnuhnung pahnihah boxer naran tak Danny Williams leh Kevin McBride hmachhawnin a tlawm ve ve a, a hun a tawp ta tih a chiang. 

Tyson hian a career chhung zawng khan dollar maktaduai 300 a hnek chhuak tling niin an sawi a, a hunlai nena ngaihtuah phei chuan tam tak a ni. Mahse, boxing a chawlhsan meuh chuan Tyson hi sum lamah a tlachhia a, dollar maktaduai 23 vel ba a nei niin an sawi!

Boxing promoter Don King chuan dik lo takin a sum hmuh tur dollar maktaduai 100 a chheprelh niin a sawi a, he thubuai hi court-ah thlenpui mah se King nen hian dollar maktaduai 14-in inremna an nei a, an thubuai a sut. 

Tyson leh Cus inpawhzia hrechiangtu tam tak chuan Cus-a thih hnuah khan Tyson hian a nun a hloh leh ṭan niin an sawi a, amah hmangaih taka enkawltu Cus liam ta kha Tyson hian a tuar a ni. 

American fighter chuan, "Mi rothap ni tura piang ka ni a, mahse kha hun te kha an liam ta. Engkim mai hi a ruak a, engmah ka ni lo. Inngaihtlawmna nun ka zir mek a ni. Hmana mi kha ka ni tawh lo a, 'keimah' kha ka ngai em em ṭhin," a ti. 

Ni e, Tyson, tlangval kum 20 mi, a hmela hlauhna reng reng awm lo, khawvel hneha ngam chaka tuihal kha - kan vai hian kan ngai vek asin!

Kum 53 mi lai ni ve tawh mah se Tyson hian tun hnaiah a boxing thiam bik vangin ngaihven a hlawh thar leh a, instagram lama a training lai video a tarlan chu social media lamah a darh nasa hle. 

Boxer che rang, hnek na, huaisen leh movement mawi em em kha second rei lote chhungin hmuh tur a awm leh a, mit a tlai a ni! UFC star Khabib Nurmagomedov chuan, "Ka ring thei lo, hei zet zawng tuma tluk rual loh a ni," tiin a 'comment'. 

WWE star ṭhin leh actor hlawhtling tak ni ta Dwayne 'The Rock' Johnson chuan, "Gym lamah ka liam ve mai ang e," a ti a, hollywood star Will Smith chuan, "Ka mi ngaihsan i ni e," tiin a sawi thung. 

Boxing leh professional wrestling match-a ring announcer lar Michael Buffer chuan, "Mike chu Mike a la ni reng a, ka career-a ropui ber pawl a la ni ta reng," tiin Tyson a dah sang hle. 

British boxer ropui David Haye chuan, "I thiamna a la ngai reng e. Kum 50 i tlin hnuah pawh khawvela pa kawlhrawng ber nih i la ṭhulh chuang lo a nih hi," a ti!

Mike Tyson hian eng vangin nge training a neih? tih chu zawhna awm a ni a, American fighter rothap hian ring chhungah kir leh a tum thu a sawi - midangte ṭanpui nan a ni. 

Tyson chuan, "Kar liam ta chhung kha training ka nei leh tawh a, round thum emaw li emaw vel chu charity leh thil dang atan inhnek leh ka tum a ni," a ti. 

Buaina awm erawh tuin nge Tyson hmachhawn duh ang? tih hi a ni a, twitter lamah hei hian sawi zui a hlawh. Twitter hmangtu pakhat Kevin Corrigan chuan cruiserweight world champion hlui Enzo Maccarinelli chu Mike a hmachhawn duh leh duh loh a zawt a, Enzo hian, "Teuh lo," tiin a chhang!

•    Keimah vanga ka nu hlim hmel emaw min chhuang hmel kha ka hmu ngai lo. Ka nu kha a rui reng mai a, amah hrechiang leh titipui turin hun ka nei lo. Professional ka nihna ang chuan chu chuan min nghawng lo a ni mai thei a, mahse 'na' ka ti ṭhin a ni. Ka ṭhiante chu an nute'n duat leh hmangaih taka an fawp lai ka hmu fo a, chutiang chu ka dawng ve ngai lo. 

•    Mi tam takin ka boxer duh ber chu Muhammad Ali ni turin an ngai a, a ni lo. Roberto Duran hi ka ngaihsan ber chu a ni. Ali chu a hmelṭha mah mah a, pa zahawm tak a ni bawk. Duran-ah zawk khan ka hlimthla ka hmu ṭhin a, amah ang nih ka duh - ani kha chu keimah ang thoa hmelchhia, pa tawi ve tak, ṭawng harsat em em ve tho kha a ni a!

•    Cus nen khan kan intawng tlai hret a, ani pawhin chu chu a hai lo, "Nang nena hun tam zawk hman hi ka duh ngawt mai," a ti leh ṭhin. A thusawi pakhat chu, "Boxing khawvelah kum 60 hun ka hmang tawh a, nang ang renga tui chilh erawh ka la tawng ngai lo," tih hi a ni. 

•    Cus kha min chhar avangin a hlim em em a, he mingo pa hi keimah avanga a hlim chhan ka hrethiam ṭhin lo. A chang chuan min en reng chung hian a nui uarh uarh a, phone a la a, "Heavyweight champion thar ka nei leh tawh ania," tiin a ṭhiante a hrilh ṭhin. Kei chuan ka hrethiam lo a, ani erawh chuan keimahah khan champion a hmu tlat a ni.