Chanmari nge lawm dawn Ramhlun North?

Mizoram Premier League champion lai Chanmari FC leh champion tuma inla ṭha Ramhlun North-te zanin dar 7:30 hian Lammualah an inhmachhawn dawn a, veng lian pahnih inkhel hi entu an tam ngei beisei a ni.

Chanmari FC hian an match hnuhnung berah Mizoram Police 4-1 in an sawp a, an match hmasa bera Dinthar FC an hneh ṭuma chakna goal khungtu Jakob Vanlalhlimpuia'n hremna a hman zawh bawk avangin an phur vanglai tak a ni.

Ramhlun North erawhin Dinthar FC an hneh ṭuma inhliam striker tlan chak Lalliansanga an la chhawr thei dawn lo.

CFC coach H. Vanlalthlanga chuan, "Ramhlun North hi chak loh theihna an ni a, chutih rualin Aizawl FC leh Chhinga Vengte nen chuan huang khatah an awm lo. Kan khelh ṭhat chuan chak ngei theihna tur an niin ka hria a, theihtawp kan chhuah ang," tiin Vanglaini a hrilh.

Thlanga hian Ramhlun North coach Samson Ramengmawia hi a naupan laiin a enkawl hman a, 2001-a Mizoramin a vawi khat nana Subroto Cup Under 17-a an champion khan Samson-a hi captain a ni a, Thlanga hi manager a ni.

Samson-a chuan, "Sir Thlanga hi Mizo coach zingah chuan a hmasa a nih mai bakah thluak ṭha a ni a, tun hi kan vawi khat intawnna tur a ni. Kan inkhel tur hi a phurawm ka ti," tiin Chanmari FC nena an inkhel tur chu a danglam thu a sawi.

Ramhlun North coach Samson chuan sawi chhunzawmin, "Chanmari West kan hneh loh ṭum khan kan khel ṭha lo a, midfield kan rem fuh tawk loh vang a ni. Tunah chuan midfield kan insiamrem tawhin ka hria a, kan chak ngei pawh ka ring," tiin a sawi.

Chanmari FC-in Liberian striker Alex Whittemore an nei a, Ramhlun North lamin Liberian midfielder Harry Delona Morris Jr. an nei thung. Zanin hian Samson-a hote hian hnehna an chang a nih chuan Chanmari FC point hmuh zat point sarih an hmu ang.