Goal li khung thei United Old Trafford-ah Rooney-a'n lawm a hlawh

Manchester United-in Pa­thianni zanah Wayne Rooney telna Everton mikhualin 4-0 in hnehna an chang a, Jose Mourinho hote hi Manchester City nen Premier League hmahruaitu an ni. Manchester khaw club pahnih hian match nga khelh tawh aṭangin point 13 ve ve an hmu a, goal 16 ve ve khungin goal hnih ve ve an chhuah tawh a ni.

United tan Antonio Valen­cia chuan minute lina lekah yard 25 aṭangin goal ropui a khung a, goal thum dang erawh Rooney chhuah hnu vekah a lut. Minute 83-naah Romelu Lukaku-a'n Henrikh Mkhitaryan goal khung tur a siam sak a, minute ruk hnuah Belgian striker hian a club hlui lamah a khung a, injury time-ah Anthony Martial-a'n ama penalty hlawhchhuah chu goal-ah a chantir bawk.

Old Trafford-ah United ṭan­tuten club record goalscorer Rooney an lawm a, English striker chuai tawh lam hi Toffees hma tawngah a la hlauhawm ber. Kum 31 mi Rooney hian a chance ṭha neih pakhat zawk goal zawnah a pet lo a, United keeper David de Gea-a'n a dan sak bawk.

Minute 82-naah Rooney hi thlak a ni a, mipuiin standing ovation an pek bakah Jose Mourinho-a'n chibai bawk mah se Toffees erawh an mangchhia aṭangin an la harh chhuak lo. Everton hian league-ah Chelsea, Tottenham leh Man United te match zawnin an hneh lo a, minute 325 chhung goal an khung tawh lo.

United lam pawh chak chiang mah se Paul Pogba awm loh a hriat a, Everton talbuai hmaah goal chance ṭha an insiam tam tawk lo. An neih chhunah striker chhuanvawr Lukaku finishing a tawih tawk lo a, minute 90 zawhah erawh goal liin an khelh ṭhat loh a thup mawi thung.

Manchester United boss Jose Mourinho chuan, "Minute 30-35 kha chu tun season chhunga kan khelh ṭhat ber ṭum a ni hial ang. Everton-in hun harsa an tawng mek a, an fixture hi a harsa em a ni. An tho chhuak em em ang," tiin a sawi.

Spanish keeper David de Gea chuan United tana match 275 a inlanah clean sheet vawi 100 a neihna chiah a ni a, record ropui tak ni mah se United hrang hlui Peter Schmeichel (180), Alex Stepney (175), Gary Bailey (161) leh Edwin van der Sar (135) te tluk tur chuan hmabak a la tam hle.