Chhinga Veng hmaah Bethlehem Vengthlang

Mizoram Premier League Season 6-ah Chhinga Veng chuanvawiin tlai dar 3:00 hian MPL6 ṭan hmaa vawi hnih an hneh tawh Bethlehem Vengthlang FC an hmachhawn ang.

Chhingcows-in an match hnuhnung berah Aizawl FC draw mah se Lalsangzuala Hmar hnuaiah hneh loh tawng loin match 15 an kal tluang tawh a, record chhuanawm tak hi BVT-in tihtawp an tum dawn a ni.

Coach Sanga chuan, "BVT hi ṭum hnih kan tum tawh a, MFA Super Cup-ah 1-0 chauhin kan hneh a, I Day Football-ah 2-1 in kan chak leh bawk. Result aṭanga thlir chuan vanneihna hi kan lamah a ṭang a, inchhuang tur kan ni lo," tiin vawi hnih an hneh tawh a club hlui Bethlehem Vengthlang lakah a inhrosa duh lo.

BVT hian tun season-ah Chawngthansanga hnuaia Chhinga Veng tih loh chu hneh loh an la tawng bik lo a, MPL-ah pawh Chhingcows leh Chanmari FC-te ang thoin hneh loh an la tawng lo. Amaherawhchu, Chawnga hote hian Mizoram Police leh Dinthar FC te an draw avangin Chhinga Veng nena an inkarah point hnih a awm.

Coach Chawnga'n an match hnuhnung berah dam­loh vangin midfielder pawimawh K. Lalnunzama (Valtea) a chhawr thei lo a, Chhinga Veng midfielder che ṭha R. Mal­sawmtluanga dang turin Valtea a pawimawh ang. En bik pakhat thlan tur a nih chuan Chhingcows forward Malsawmfela aia thlanawm an awm lo.

Ramhlun South tlangval Sawmfela hian MPL6-ah match thum khelhah goal a la khung vek a, Chhinga Veng tan goal 21 khung tawhin tun season match 14 a khelh tawhnaah match hnihah chiah goal a khung lo.