Mizo goal-in India chhan zo lo

South Asian Football Federation Under 18 Championship-a an match hmasa berah India U18 an tlawm nghal - nimin khan Bangladesh U18 chu 4-3 in an ngam lo. India U18 hian first half-ah 3-0 in hma an hruai - India goal hmasa ber hi Mizo striker Lawmpuia'n minute 19-na lekah a khung a, minute 32-naah Edmund Lalrin­dika chuan penalty hmang­a khung zuiin first half hun pek belhah RP Arnald chuan goal khat a thawh ve bawk a, goal dang lut loin chawlhlawk hman a ni.

First half-a an khelh dan ena chak mai tura ngaih an nih laiin India U18-in an inthlahdul rah an seng a, Bangladesh hian second half-ah goal li khungin hnehna an chang - Mizo rawlthar Lalengzama'n bar a pet per chu an ui khawp ang. India hian September 22-ah an match hnihna chu inelna thlengtu Bhutan nen an khel leh dawn. SAFF U18-ah hian Bangladesh, Bhutan, India, Maldives leh Nepal te chu an inkhel kual vek ang a, a tawpa point hmu sang ber chu champion an ni ang.

India squad-ah hian Mizo paruk defender Lalliansanga Renthlei, midfielders Lalengzama Vang­chhia, Lalnun­tluanga Bawitlung, Zonunmawia leh striker pahnih Edmund Lalrindika leh Lalawmpuia te an awm a, nimina Bangladesh nen an inhmachhawnna inkhelah hian an inlan kim vek.