Stamford Bridge-ah Arsenal-in point an hmu

Arsene Wenger kaihhruai Arsenal-in tun hnai kum ruk chhunga a vawi khat nan Stamford Bridge-ah point an hlawh chhuak. Pathianni zan Premier League inkhelah champion lai Chelsea leh Gunners te chu goal khung loin an inhnehtawk a, hun tawp dawnah Blues defender David Luiz chu hnawhchhuah a ni.

Chelsea khelmualah Ar­senal hian league match bikah an lenluh hnuhnung vawi 18-ah goal chhuah loh an vawi khat neihna a ni a, Anfield-ah Liverpool laka si li an phurh hnua Blues laka an result vang­in Wenger chuan a lawm thu a sawi. Antonio Conte-a'n a enkawl hnuah Chelsea hian an khelmualah match 27 khel tawhin a vawi khat nan goal an khung loh ṭum a ni ve thung.

A goal lo

Arsenal playmaker Mesut Ozil chu tihrawl na vangin a inlan thei lo a, Europa League lama goal khung hlim Alexis Sanchez pawh bench-ah ṭhuttir a ni. Blues pawhin season hmasa an champion theih nana player pawimawh ber pakhat Eden Hazard chu inkhel bul an ṭantir bik lo.

Chelsea forward Pedro-a'n Arsenal captain hlui Cesc Fabregas hnen aṭanga a ball hmuh chu ṭha zetin lalut mah se keeper Petr Cech chiah a hmachhawn tawhah a paltlang zo lo. Arsenal midfielder Aaron Ramsey-a'n buai nuaih kara ball a kaltlangpui hnuah goal ban a pet per a, a rawn per let lam chu hnai set sawt aṭangin Gunners player manto ber Alexandre Laca­zette chuan a khung ṭhelh bawk.

Germany international Shkodran Mustafi-a'n freekick aṭanga ball rawn kal a tauh luh chu offside vangin pawm a ni lo a, hun tawp dawnah Luiz-a'n a ball hloh hum a tumna lamah Sead Kolasinac a tlawh avangin red card pek a ni. Brazil international hian Premier League match 119 a khelh tawhah hnawhchhuah a vawi khat tawhna a ni.

Chelsea defender hian ball kang an inchuhna lamah Laurent Koscielny a pet avangin yellow card a hmu lawk tawh a, Kolasinac laka a chet dan vang hian referee Michael Oliver-a'n yellow card phawrh nawn loin red card a phawrh tlang nghal - match thum chhung hremna a hmachhawn ang.

Wenger a lawm

Arsenal manager Arsene Wenger chuan Reds laka an mualpho hnua point an hmuh avanga a lawm thu sawiin, "Season khat chhunga match 55 khelh a nih chuan tih fuh loh chang chu a awm thei a ni, tun ṭumah chuan ka nauten an tih tur an hria a, an hna ṭha taka thawkin kan vanneih ni chu ni sela chuan point thum kan hmu ang," tiin a sawi.

French manager chuan sawi chhunzawmin, "Chelsea hi an khelmualah chuan team

ṭha leh khawng tak an ni, tun hnaia result ṭha kan neih theih lohna hmunah point kan hmuh avangin a lawmawm," a ti. Arsenal hian Nilaini zanah EFL Cup khel turin League One club Doncaster Rover chu Emirates Stadium-ah an mikhual ang.

Conte a vui lo

Premier League-a season a hman hmasak bera champion nghal thei Antonio Conte chuan, "Referee chungchangah sawi tur ka nei lo, official-te hi kan zah hle a ni. Chutih rualin Arsenal nen kan intawn hnuhnung vawi thumah player 10 ni chunga hun tawp kan hmang ṭhin erawh hriatthiam a har," tiin red card chungchang a sawi.

Italian manager Conte chuan, "Arsenal nena inkhelh hi chu engtik lai mahin a awlsam ngai lo. Kan khingpui kan hriatchian avangin invenna lai tur kan hria, team ṭha tak pahnih inkhel kan nih avangin draw hi result awm tak a ni," a ti. Blues hian Thawhlehni zanah Championship club Nottingham Forest an bitum ve leh thung ang.