India an chak nghal

ODI series match nga an khelh tura an match hmasa ber chu Pathianni khan India leh Australia-in an khel ṭan a, mualneitu India-in run 26-in hnehna an chang nghal. M.A. Chidambaram Stadium, Chennai-a inkhelah India an bat hmasa zawk a, inkhel ṭantir lamah an talbuai.

Over 21.3-ah India-in wicket nga hlohin run 87 chiah an la siam a, Australia laka chak turin mipuiin an beisei ngam lo. Mahse, Hardik Pandya a rawn pen chhuak a, run siam loa Virat Kohli out zanah ball 66 hmachhawna run 83 siamin India chu hmun himah a hruai thleng. Run 79 siamtu MS Dhoni sawi hmaih theih a ni lo bawk - over 50-a zawh meuh chuan India hian run 281 an vaw chhuak a, wicket sarih an hloh.

Australia bat hun a thleng a, beisei an phak bik lo - run 39 vaw chhuak­tu Glenn Maxwell chu Baggy Greens (Australia cricket team sawina) tana run siam hnem ber a ni! Ruah surin inkhel a tihbuai avangin DL method hman a ni a, Aussies ho hian over 21 thleng chauh ball an hmachhawn - run 137 vaw chhuakin wicket kua an hloh hman a, DL method hmangin run 26-a chak loah puan an ni ta a ni.

India leh Australia hian September 21-ah series match hnihna chu Kolkata khawpuiah an khel leh ang.