Leeds United-in nomawi an chawi ta

Championship kharna inkhelah Leeds United-in Nilaini zan khan Charlton Athletic 4-0 in an hneh a, Marcelo Bielsa hoten Elland Road-ah nomawi an chawi. Season tharah Leeds-in Premier League an khel dawn a, an thawm a ring nghal hle.

Leeds United-in Charlton an hmachhawn hmain Championship-ah an champion tih an hre tawh a, inkhelh banah nomawi an chawi dawn tih an hre bawk. Inkhelh ṭan phat aṭangin an phur a, a khat mawi tawkin goal an khung.

Bielsa hote tan Ben White (14'), Stuart Dallas (28'), Tyler Roberts (51') leh Jamie Schakleton (66') ten goal khat ṭheuh an khung a, Charlton 4-0 in an sawp. Addicks erawh an chak zawh loh avangin an relegate a, season tharah Wigan Athletic leh Hull City te nen League One-ah an inlan ang.

Charlton enkawltu hi Leeds United player hlui Lee Bowyer a ni a, Championship-a inhamtang turin point khat chiah an mamawh. Amaherawhchu Leeds-in Bowyer leh a hote chungah zahngaihna an lantir lo a, Leeds legend hi a club hluiin nomawi an chawi zanah a nui ve thei lo. Leeds hian Championship match 46 aṭangin point 93 an hmu a, anmahni hnaih bertu West Brom aiin point 10-in an hmu tam zawk. English forward Patrick Bamford-a'n league-ah goal 16 khungin club top scorer a ni. 

Premier League an khelh hunah erawh Bamford hi an rinrawl a ni tawh kher lo ang. Khawvel huapa coach tawnhriat ngah ber zinga mi Marco Bielsa enkawl team hi striker ṭha Zlatan Ibrahimovic leh Edinson Cavani nen an sawi zawm der tawh. Nomawi chawi zanah pawh Leeds hian boruak an siam hle. Bielsa hote hian Elland Road chhunga nomawi chawi ringawt chu duh tawk loin stadium pawnah an chhuak a, bus chungah chuangin champion an lawm. England-ah Covid-19 vanga inkhuahkhirhna kalpui reng a nih avangin Leeds chet danin mak tih a hlawh a, amaherawhchu English club hi thiam takin an insawifiah.

Leeds United chuan, "Safety Advisory Groups (SAG) leh Council nen kan inrawn a, stadium pawna bus dah min phalsak. Safety group hian player-te hi nomawi nena hun rei lote chhung an inlan chuan mipui pungkhawm hi an haw darh hma an beisei a, min ṭantute him nan hma kan la a ni," tiin an insawifiah.