Chanmari West-in I League champion an hre lo

Mizoram Premier League Season 6-ah Chanmari West-in nimin tlai khan Lalremruata goal hmangin Aizawl FC 1-0 in an hneh.

I League champion Aizawl FC hian coach Paulo Menezes hnuaiah MPL-ah chak an la nei lo a. West Warrior erawhin Dinthar FC an hneh zawhah AFC an hneh avangin point ruk an hmu ta.

Player siksawi nasa

Aizawl FC coach Paulo Me­ne­zes-a'n player a siksawi nual a, Chhinga Veng nena inkhel bul ṭantute player paruk zet chu bench-ah a dah.

Portuguese coach hnuaiah William Lalnunfela, Liandala (Sena), H. Lalmuankima, Ram­din­sanga, Jonathan Lalhriatkima leh Paul Ramfangzauva ten MPL-ah a vawi khat nan inkhel bul an ṭan.

Chanmari West coach HC Zarzoliana erawhin match pawi­mawhah player pawimawh a khelhtir vek thung.

A goal lo

Aizawl FC forward William-a'n chance ṭum hnih nei nghal mah se a hmasa zawk keeper Vanlalhriata'n a dan sak a, a vawi hnihnaah keeper leh crossbar a pet khum.

AFC midfield-ah David Lal­rin­muana, K. Lalṭhathanga leh S. Malsawmtluanga te awm loh a lang a, awmze neiin ball an inpe kual thei lo.

First half tawp lamah Chan­mari West an chungnung zawk a, captain Lalnunmawia'n box pawnah hun awl a ngah chungin goal zawnah a pet thei lo. Ball pet thiam Jacob Lalrawngbawla freekick pet keeper Avilash Paul-a'n a dan sak bawk.

Chhandamtu Remruata

Second half-ah inkhel nung tak hmuh tur a awm lo. Minute 74-naah substitute keeper Lal­malsawma petchhuah aṭanga ball kal chu Lalremruata'n box sir aṭangin goal ban perin a pet goal.

AFC lamin Mama leh David luhtir mah se danglamna an thlen pha lo. Chanmari West winger Vanlalthlamuana'n goal khungna tur chance ṭha a hlah a, injury time minute nga pek a nih avangin an talbuai phah.

I League champion-in hun tawp lamah nawr na ve bawk mah se keeper Malsawma tan harsatna an thlen thei lo a, West Warrior-in Aizawl FC an hneh.