Mercedes hlim niah Ferrari an ṭap

Kum dang ang chu ni se Pathianni tlai a tlan zawh tak Formula 1 Singapore Grand Prix-ah khan Ferrari driver ten hnehna hlado an chham leh ngei ang. Mahse, kuminah erawh Ferrari hian chhiat an tawk a, an elpui Mercedes driver Lewis Hamilton chuan hnehna a chang thung.

Marina Bay circuit-ah lap khatna lekah Ferrari driver pahnih Sebastian Vettel leh Kimi Raikkonen te chu intai palhin intlansiak an hmachhawn zui thei lo. Formula 1 intlansiak lap khatna leka Ferrari car pahnih an chetsual dun vawi khatna a ni. Ferrari driver pahnih an chetfuh loh zan hian pangana aṭanga bul ṭantu Hamilton chu pakhatna a ni a, Mercedes driver pakhat zawk Valtteri Bottas chu pathumna a ni.

World champion vawi thum ni tawh Hamilton hian point 263 hmuin driver championship hmahruaitu a ni chhunzawm zel. Hamilton-a elpui ber Vettel-a'n point a hmuh belh loh avangin Britain driver hian point 28 zetin hma a hruai fal. October 1-ah Malaysia Grand Prix tlan leh a ni ang.

Kum 32 mi Hamilton chuan, "Sebastian nen inelna hautak kan hmachhawn leh turah ka ngai a, beisei loh ang takin thil a thleng ta zawk. Qualifying-ah beisei kan phak lo nachungin inelna takah erawh rin loh danin thil a thleng. Infiamnaah chuan eng pawh a thleng thei a, tun ṭum bikah chuan Mercedes team nih a nuam hle," tiin a sawi.

Singapore GP Results
# Driver Car
1 Lewis Hamilton Mercedes
2 Daniel Ricciardo Red Bull
3 Valtteri Bottas Mercedes
4 Carlos Sainz Toro Rosso
5 Sergio Perez Force India
6 Jolyon Palmer Renault
7 Stoffel Vandoorne McLaren
8 Lance Stroll Williams
9 Romain Grosjean Haas