EFL Cup Chak lo hlim Reds leh Spurs inlan dawn
Premier League-ah Liverpool leh Tottenham Hotspur-ten hneh ngei tura ngaih an khingpui ve ve an inhnehtawkpui a, zaninah EFL Cup third round khel turin an inlan leh nghal dawn - an phur vanglai a ni lo.
Spurs aiin Liverpool hmabak hi hautak zawk tura ngaih a ni - Reds hian Premier League club tho Leicester City an lenchilh dawn a, zan dar 12:15-ah an inlan ang. Premier League club lian dang inlan tur zingah Tottenham chuan zan dar 12:30-ah Barnsley an mikhual dawn bawk a, club pahnihin hnehna an chang zo lo leh a nih chuan an mualphona belhchhahin a awm dawn tihna a ni.
Harh ngai Reds
Liverpool-in Manchester City 5-0 ngawta an ngam loh hnuah an tho leh tawh lo - Sevilla leh Burnley chu Anfield-ah a zawnin an inhnehtawkpui a, zaninah an mangchhia lak aṭanga harh tumin Foxes khelmual an pan ang.
Reds boss Jurgen Klopp chuan, "Kan khelh phu ang tawkin result hlawh chhuak ṭhin ni ila chuan hnehna kan chang zel ang. Mahse, a pawimawh ber erawh hmasawn zel a ni. Tunah chuan Leicester kan hmabak a, a hnuah Moscow leh Newcastle kan pan leh ang. Kan match tinah hian hma kan sawn zel ka beisei a, theihna kan neih san zia kan hre vek a ni," a ti - Reds hian zanin match zawhah Foxes vek hi Premier League-ah an lenchilh leh ang a, Spartak Moscow leh Newcastle an pan leh bawk dawn. Klopp-a'n zaninah chhawr tam loh player a chhawr a rinawm.
Wembley a ni lo
Spurs-in White Hart Lane an sak ṭhat mek avangin season hmasa European match aṭangin Wembley Stadium chu an home match khelh nan an hmang a, Champions League aṭang hian group stage-ah petchhuah an ni a, tun season-ah pawh England stadium hmingthang hi an la hmang thiam chuang lo - an khelmuala Premier League match thum an khelh tawhah an la chak miah lo! Zaninah Championship club Barnsley an mikhual dawn.
Tottenham manager Pochettino chuan, "Wembley-ah kan che ṭha loa inngaihna hi kan kalsan a ṭul a, chu chu kan ti thei a nih loh chuan thil kal tawhah kan cheng reng dawn tihna a ni. Thil kal tawh sawi a ṭul lo a, eng takin hma hun kan thlir tur a ni," tiin Wembley-a an chet chhiatna theihnghilh a duh a, chu thil thlentir tur chuan zaninah Barnsley an hneh a pawimawh ang.
EFL Cup - Third Round
Zanin Inkhel Tur
Leicester City 12:15 Liverpool
Brentford 12:15 Norwich City
Wolverhampton 12:15 Bristol Rovers
Burnley 12:15 Leeds United
Bristol City 12:15 Stoke City
Aston Villa 12:15 Middlesbrough
West Ham United 12:15 Bolton Wanderers
Crystal Palace 12:15 Huddersfield Town
AFC Bournemouth 12:15 Brighton & Hove Albion
Reading 12:30 Swansea City
Tottenham Hotspur 12:30 Barnsley