Sawiselna kara Real chakpuitu Bale

Hmanni lawkah Real Madrid fan-ten Gareth Bale an 'boo' khum hluah hluah a, a chhanletna chu goal a ni - Pathianni zan khan Real Madrid chuan league match-ah Real Sociedad an lenchilh a, 3-1 a hnehna changin Bale-a'n goal khat a khung.

Real tan rawlthar duhawm Borja Mayoral a inlar bawk a, kum 20 mi striker hian goal khat a khung bakah Sociedad-in an lama an pet goal palh chu Mayoral thawhrah hi a ni bawk - Sociedad in match thum chhung a zawna an chak hnuah chak lo hmel an hmu ve ta a, Real tan league match hnih an chak zawh loh hnua an chakna hmasa ber a ni ve leh thung.

Inkhel chu

Spanish champion-in goal khung turin an nghah rei a ngai lo a, goal klhungtu erawh rin loh lam aṭangin a ni - minute 19-naah striker Borja Mayoral chuan hnai set sawt aṭangin hmahruaina goal a khung a, Real tana a goal khung hmasa ber a ni. Mualneitu team tan Kevin Rodrigues chuan minute 28-naah an si phurh a sut a, Keylor Navas a chesual.

Mahse, Rodrigues-a'n an si phurh a sut aṭanga minute kuaah an lamah a pet lut palh a, Mayoral thawhrah bawk a ni. Minute 61-na a ni a, Bale inlar hun a ni. Welsh winger hian chak taka ball tlanluhpuiin Sociedad goal-ah a khung a, amah sawiseltute goal hmangin a chhanglet.

Tu nge Mayoral?

Real Madrid tana Gareth Bale lansarh zanah Borja Mayoral-a chanchinin ngaihven a hlawh hle. Kum 20 mi striker hi Real Madrid youth system chhuak a ni a, B team tan match 38 a khelhah goal 17 a khung. Season hman zawh takah khan VfL Wolfsburg lamah loan-a kaltir a ni a, vawi 21 inlanah goal hnih chiah a khung.

Kuminah erawh Real tan league match hnih chiah a la khel chungin goal a khung ve ta a, UEFA European Under 19 Championship 2015 top scorer hian ngaihven a hlawh zui zel ang. Real boss Zinedine Zidane chuan, "Player ṭha tak a ni. Kum naupang tak la ni mah se kan tan player pawimawh a ni dawn a, goal a khung avangin ka lawmpui a ni," a ti.

Real tan Bale

Real Madrid-in Valencia leh Levante a zawnin an inhnehtawkpui tawh a, an elpui ber Barcelona-in tawlh thluk an tum bawk si loh avangin Real tan chak loh a thiang tawh lo - hrem vanga Cristiano Ronaldo a la inlan theih bawk si loh avangin a bik takin Bale-a chungah beiseina a sang a, an beisei ang ngeiin a theihna a pholang.

Madrid boss Zidane chuan, "Bale-a'n goal a khung thei hi ka lawmpui takzet a, a chungchang thuah thu lengvak a tam em em a, mah se a theihna a pholang leh ta. Metre 70 zeta thui tlan chungin goal a khung a, hetichung hian ka ngaihdan chuan a ṭhat dan berin a la khel lo," a ti a, a forward chungah a bei­sei a sang hle.

Carvajal a rinawm

Real Madrid-in chak piah­lamah chanchin lawmawm dang an nei a, right-back Dani Carvajal chuan 2021-2022 season thleng Real tana khelh chhunzawm turin contract thar a ziak. Kum 25 mi defender hian kum 2013 khan Bayer Leverkusen aṭangin Real hi a zawm a, match 165 a inlan sak tawh.

Spain international hian Real tan a khelh chhungin Champions League (3), La Liga (1) leh Copa del Rey (1) a chawi a, ani hma hian left back Marcelo leh midfielder Isco huan 2022 thleng khel tur hian rinawmna thu an lo tiam tawh bawk.

Inkhel dang

Villarreal-in tun season-a inelna hrang hranga an match hmasa palia hnehna an chan zawh loh hnuah chak hmel an hmu ve ta a, khualmualah Alaves chu 3-0 ngawtin an sawp. Inkhelh zawh rual hian Alaves chuan coach Luis Zubeldia an ban thu an puang nghal bawk.

Chelsea striker hlui Loic Remy chuan Las Palmas tan goal khungin Athletic Bilbao lakah a team hi 1-0 in hnehna a chanpui a, Sevilla chuan table-a pathumna dinhmun luah turin Girona chu 1-0 in an hneh bawk - goal awmchhun hi Luis Muriel khung a ni.