Bundesliga-ah Dortmund an kal zel

Bundesliga hmahruaitu Borus­sia Dortmund chu hneh loh nei loin an kaltluang zel. Pathianni zan khan Dortmund hian table mawngphah a awm Cologne chu 5-0 in an sawp a, point 10 hmuin table chung berah an awm chhunzawm.

Dortmund tan hian Pierre-Emerick Aubameyang leh Maxi­milian Philipp ten goal hnih ve ve an khung a, Sokratis Papa­stathopoulos-a'n goal khat dang a thawh ve bawk. Gabon international hian season kal laiah league match li aṭangin goal li a khung tawh a, season hmasa top scorer a nihna vawng nung turin season bul a ṭan fuh hle.

Europa League-a Arsenal ngam lotu Cologne hian season duhawm lo an hman chhunzawm zel. League match li khel tawhin an tlawm fai vek a, kum 1962-63 hnulama season bul an ṭan chhiat ber ṭum an tawng chho mek.