Juventus chakna Paulo Dybala

Paulo Dybala-a'n Juventus tan match 100 a khelh tlin zanah hattrick a siam. Argentine forward hian Sassuolo lakah a team hi 3-1 a hnehna chanpuiin champion lai Juve hian Serie A season kal laiah 100% chak record an la nei.

Kum 23 mi Dybala hian minute 16, 49 leh 63-naah goal a khung a, Juventus player zingah season ṭan tir lam match hmasa palia goal khung vek thei hmasa ber niin tun season-ah goal riat a khung der tawh. Sassuolo hma khan Genoa lakah hattrick a siam tawh bawk a ni.

Juventus manager Massimiliano Allegri chuan, "Hmasawnna tur a la nei a, khawvel player ṭha fal bikah a insiam chho mek a ni. Tun dinhmunah chuan khawih chet thiang lo a ni," tiin Juventus tana inelna hrang hranga match 100 a khelh aṭanga goal 52 khung thei Dybala a dah sang hle.

Turin club tana mellung pawi­mawh phuntu Dybala chuan, "Inkhel vawi khatah hian goal khat chauh khung pawh a lawmawm a, goal thum khung chu a lawmawm zual bik hle. Team ṭha tak kan indin a, chumi zinga player pawimawh ka ni ve phak chu ka lawm hle," a ti.

Serie A season kal laiah Juventus bakah Inter Milan leh AS Roma ten 100% chak record an la nei vek, Juve tan an nomawi humhim a awlsam dawn lo. Champion tum ngam AC Milan erawh vawi khat an chak lo tawh thung. Milan hian Pathianni zan khan Udinese 2-1 in an hneh a, an chungah club pali an awm.