Goal khung lo PSG an chak

Paris St-Germain player 11 ten Lyon lakah minute 90 chhungin goal an khung lo. Mahse, Unai Emery naute hian own goal pahnih hmangin an mikhual Lyon chu 2-0 in an hneh.

Pathianni zan French Ligue 1 inkhelah Edinson Cavani-a ball khawih per chu Marcelo-a'n anmahni lamah a ti lut palh a, Kylian Mbappe-a goal shot an tih per chu keeper Anthony Lopes tan dan hman a ni lo bawk.

Goal pahnih a luh inkarah hian Lyon defender Ferland Mendy chuan Mbappe as tihtluk vangin penalty a chawi a, he penalty hi Cavani leh Neymar ten pet an inchuh hnuah Uruguay international Cavani-a'n a pet a, goal bar pet perin a per let hi keeper-in man sakin a goal lo.

Penalty chhuih inchuh chung­chang sawiin PSG manager Emery chuan, "Anmahni pahnih kha in­siamrem turin ka ti a, pet goal thei ve veah an inngaih avangin khatiang thil kha a thleng a ni. An pahnih inkarah thutlukna an siam fel lo a nih chuan keiman a pet tur zawk ka ti chiang ang," tiin a sawi.

PSG hian match ruk an khelh tawhah hnehna an chang vek a, point 18 hmuin hmahruaitu an ni - champion lai AS Monaco aiin point thumin an sang zawk mek.