EPL-ah West Brom an kir

West Bromwich Albion chuan Championship khar zanah QPR chu 2-2 in an inhnehtawk pui a, season tharah Premier League an khel dawn - anmahni umtu Brentford an chak loh avangin pahnih dinhmun an nemnghet.

Nilaini zan inkhelah Baggies tan Grady Diangana leh Callum Robinson ten an khung a, mikhual lamin Ryan Manning leh Eberechi Eze te hmangin an khung ve bawk. Baggies-in EPL an khelh dawn lai hian QPR erawh 13-na ni chungin season an khar thung.

Inkhel dangah pahnihna nih la beisei thei Brentford chu tlak hlau Barnsley mualah 2-1 in an tlawm. Hnehna an chan avangin Barnsley an him, West Brom tan Premier League kawng an sialsak bawk. Brentford erawh English football inelna sang ber khel tur chuan playoff an paltlang a ngai dawn.

West Brom boss Slaven Bilic chuan, "EPL khel tura tlin hi kan tih theih sang ber chu a ni. Season kan hman dan a hlimawm zia leh nawm zia hi sawi mai theih pawh a ni lo. "Kan ram Croatia kha kum ruk chhung ka enkawl tawh, khatiang hun ang baka hlimawm kha a awm leh theih ka ring tawh ngai lo. Kha tih hunlaia ka hlimna ang bawk kha tunah hian ka tawng leh mek a ni," tiin a sawi.

Championship aṭang hian pakhatna Leeds leh pahnihna Baggies ten EPL an khel dawn, hmun ruak pakhat la awm chu Brentford, Fulham, Cardiff leh Swansea ten playoff hmangin an zawng leh ang. Charlton Athletic, Wigan Athletic leh Hull City te erawh an relegate thung.