Inter Milan tan nomawi beiseina a tawp

Serie A pahnihna ni tur leh nomawi beisei zel turin Inter Milan tan chak a ngai a, mahse Nilaini zana an mikhual Fiorentina nen goal awm loa an inhnehtawk avangin league title chu ui tak chunga an thlir liam a ngai dawn ta.

Nizan khan champion lai Juventus chu table hnuai lama awm Udinese khelmualah an lenglut a, Old Lady hian hnehna an chang a nih chuan a zawna a vawi kua nan Serie A champion an ni ang - Maurizio Sarri naute tan an nomawi kawl lai chu a hima sawi ngam a ni.

Season tir lamah Inter Milan an kal fawr a, a laihawlah an zuih. Juve erawh kal fawr lai em em an nei lo a, tlak hniam lai an nei lo thung. Inkharkhip a zawh hnuah squad an neih chhah an chhawr ṭangkai, hun pawimawh lai takah point an hmuh ṭhin chu an chhawr.

Antonio Conte-a'n tun hnaia an fixture awmdan a sawisel a, inkharkhip hnuah match an ngah bik leh hahchawlhna hun an nei tlem chu an tuar thu a sawi - coronavirus len hma khan an khel tlem bik a, a hnu lamah match an ngah phah a ni.

Italian manager sawi ang ngeiin San Siro-ah Inter player an chau tih a hriat. Christian Eriksen leh Romelu Lukaku ten inkhel bul ṭanin beiseina an siamsak zauh zauh a, mahse nidang angin an vanneih ni a her chhuak thei lo.

Inter tan tun hnaia harh thar mek Alexis Sanchez pawhin hun ṭha nei mah se goal bar a tihper a, winger Antonio Candreva goal khung chu offside vanga pawm a ni lo bawk. Inkhel thunun chunga goal an sual chhuah theih loh avangin point khatah an lungawi a ngai.

Inter Milan hi pathumna an ni mek a, league match khelh hmabak pathum nei chungin pahnihna Atalanta an phak lohna chu point khat a ni. Hmahruaitu Juve lakah erawh point sarihin an hniam zawk - season tira an dinhmun nen a danglam ta hle.

Conte chuan, "Pahnihna nih chu a chak lo zawk tihna a ni a, mi ṭhenkhat chu tuna kan dinhmunah hian an lawm a ni mai thei, ka tan chuan pakhatna nih lo chu thil awmze nei lo mai a ni," tiin nomawi chawi lo chuan a lungawi ve ngai loh thu a sawi. Italian manager hian tun hmain Old Lady a enkawl tawh, a zawnin league nomawi vawi thum a chawi pui. Chumi hnuah Chelsea kaihruai lehin Premier League leh FA Cup an chawi leh bawk - Inter tan erawh league lamah hlawhtlinna a chang nghal mai lo.

Nilaini zan inkhel dangah AS Roma chuan a hniam bera awm leh tla chiang tawh SPAL lakah goal surtirin 6-1 in an sawp. Roma tan hian Nikola Kaninic, Carles Perez, Aleksandar Kolarov, Bruno Peres leh Nicolo Zaniolo ten goal an khung.

Roma hi panganaah awmin season thara European football khel turin an tling tawh. Napoli erawh Parma lakah 2-1 in an tlawm thung, Gennaro Gattuso naute hi pasarihna ni mah se Coppa Italia nomawi an chawi avangin Europa League chu an khel dawn.

League lama beisei phak lo Napoli hi inelna dangah erawh an tawh a khirh hle. Champions League last 16-ah Barcelona chu 1-1 in an inhnehtawk pui a, a thiam pariat zinga inhlangkai turin beisei an la nei sang - August thla hian Catalan club lian barakhaih an tum ang.