Juric tan contract thar

Serie A club Hellas Verona chuan an coach Ivan Juric chu kum thum daih contract thar an ziah pui a, inremna an neih thu hi Nilaini zan khan an puang. Contract thar ziah zanah Torino nen 1-1 in an inhnehtawk. Kum 44 mi Juric hian season hma ṭan dawn khan Verona hi a zawm, division hniam aṭanga Serie A kai hlim an nih avangin an hna a hautak dawn tih a chiang. Beisei aia che ṭhain tun dinhmunah pakuana an ni. Verona chuan thu chhuah siamin, “Juric hna thawh leh club a kaihhruai danah kan lunga a awiin a chungah kan lawm hle. Tunah chuan 2023 June thla tawp thleng atan inremna kan ziak,” an ti.

Croatia international midfielder hlui hian team enkawl lamah sulhnu a nei nual tawh. Atalanta coach nilai Gian Piero Gasperni nen Genoa an enkawl dun tawh, chumi hnuah Inter Milan leh Palermo lamah assistant coach hna a thawk tawh bawk.