A chung berah Chhinga Veng

Nimin tlai inkhelah Chhinga Vengin MS Dawng­liana goal hnih hmangin Bethlehem Vengthlang FC chu 2-0 in an hneh. Chhingcows hian Mizoram Premier League Season 6 match li khelh tawh aṭangin point 10 an hmu a, league hmahruaitu an ni.

Lalsangzuala Hmar hnuaiah Chhinga Vengin hneh loh nei loin match 16 an kal tawh a, hemi tithei tur hian BVT hi ṭum thum an hnehna chiah a ni.

Sawmfela a awl
Chhinga Vengin an top scorer Malsawmfela an hahdamtir a, Zirtawpni zana Chanmari FC-ah erawh Ramhlun South tlangval hian inkhel bul a ṭan tawh ang. Nizan khan Chanmari FC leh Ramhlun North an inkhel a, result kan hre hman lo.

Danglamna Msa
Chhinga Vengin goal chance an nei nghal a, Dawng­tea siam sak chu Lalram­muanpuia'n (Apuia) goal zawnah a pet lo. BVT an insiamṭha chhunzawm a, amah­erawhchu goal khung khawpin an cheṭha lo.

Team pahnih an intluk tawk a, goal hmaah an hlauhawm loh. BVT defender PC Laldinpuia tlarhnungah a ṭangkai a, Malsawmfela tel lohna Chhinga Veng goal nawr a na lo hle.

First half tawpah player ṭha danglamna a lang a, box pawnah MS-a'n a hun awl neih ṭhat hmang ṭangkaiin Vallalawma goal khungna turin ball fing a pe lut. Khawzawl tlangval Lawma'n goal ban pet per nan hmang mah se a per chu Dawngtea'n goal ruakah a khung.

Dawngtea bawk
Second half-ah inkhel a danglam lo a, team pahnih an intluk tawk chhunzawm zel. Chhinga Veng forward Apuia'n BVT offside trap bumin keeper chauh hmachhawn mah se a club hlui lamah a khung thei lo.

Minute 64-na­ah Lal­dampuia leh Lalrinchhana te thawhrah sengin Dawngtea'n cool takin goal hnihna a khung. Chhingcows goal nawr a na chhunzawm thung. Substitute Lalkhawpuimawia'n box chhunga a chest hnuah a back volley a, crossbar a per. Hemi per hi Dawngtea'n awlsam takin pet lut mah se Bawngkawn tlangval hi a offside.

BVT-in striker ṭha an neih loh an tuar a, Chhingcows tlarhnung an tibuai pha lo a, point an hlawh chhuak thei lo.

Hmabak
BVT coach Chawng­thansanga'n match hnih hremna a hman ṭan avangin Zirtawpni tlaia Ramhlun North an hmachhawn hunah a team a la ho thei lo ang. Zirtawpni zanah I Day Football final rematch en tur a awm dawn a, Chhingcows leh Chanmari FC inkhel tur a hmuhnawm ang.