EFL Cup United, City, Blues leh Gunners inlan dawn

Zaninah Premier League club lian Manchester United, Manchester City, Chelsea leh Arsenal ten EFL Cup third round an khel dawn. Eng inelna huangah pawh nomawi chawi a harsat tawh avangin League Cup hi tun hma aiin an ngaihlu tawh zawk - player naupang zawk khelhtir nan chauh an hmang tawh lo.

Club lian inlan tur zingah Manchester City hmabak a hautak ber tura ngaih a ni. Pep Guardiola naute hi West Brom khelmualah an lenglut dawn. Blues, United leh Gunners ten division hniam zawk club an mikhual dawn avangin harsa lutuk loa tlang tura ngaih an ni.

Champion lai

Season hmasa khan Jose Mou­rinho kaihhruaina hnuaiah Man­chester United hian Europa League leh League Cup nomawi an chawi. Portuguese manager hi a kalna lam apianga nomawi chawi duh mi a nih avangin eng inelnaah pawh chak a duh ṭhin - zanin dar 12:30-ah Championship Club Burton an mikhual ang.

Kum 2006 January thla khan khatih hun laia non league club Burton hian League Cup third round-ah tho hian United hi an khelmualah goal awm loin an inhnehtawkpui tawh a, Old Trafford-a replay a khelh ṭum erawhin Sir Alex Ferguson-a kaihhruai United 5-0 in an chak.

Premier League hmahruaitu United tan Paul Pogba chu hliam vangin a khel thei dawn lo chiang a, league lama chhawr rim loh Michael Carrick leh Victor Lin­delof te inlan tura beisei an ni. Defender thar Lindelof hian league match a la khel lo a, Champions League-a Basel an hneh ṭumin minute 90 chhung a inlan tawh thung. Rawlthar Scott McTominay leh Andre Gomes te tan pawh hmun a awm tura ngaih a ni.

Hazard inlan dawn?

Belgium tan koh a nih laiin Eden Hazard kerek a hliam a, zai a nih vangin season kal laiah Chelsea tan inkhel bul a la ṭan lo. Hazard hian kartawp khan bench aṭanga tlan lutin Arsenal a hmachhawn thei tawh a, zaninah hian a vawi khat nan Blues tan bul a ṭan beisei a ni.

Kum 26 mi Hazard chuan, "Antonio Conte-a'n Chelsea a rawn enkawl aṭang khan kawng hrang hrangin hma ka sawn a, Juventus a enkawl lai aṭang tawh khan manager ṭha tak a ni tih ka hre tawh, ani nen kan thawkdun thei hi ka lawm hle. Tlarhma lam pui tura min tih pawn nuam ka ti a, goal venghim tura tlanlet pawh ka hreh chuang lo," tiin Italian manager Conte kaihhruaina hnuaia inkhelh nuam a tih thu a sawi.

Tun hma chuan Chelsea leh Nottingham Forest inkarah in­chhuang thei bik an awm meuh lo. Club pahnih intawn tawhnaah Chelsea hian vawi 37 hnehna an chang a, ṭum 26 an chak lo thung - vawi 28 chu an inhnehtawk. Tunah erawh club pahnih dinhmun a inang lo rih hle; Chelsea hi Premier League champion an nih laiin Nottingham erawh Championship club vantlang an ni.

Pep-a City

Barcelona leh Bayern Munich manager hlui Pep Guardiola-a'n City tana a season hmasa berah beisei a phak lo a, a ropuina neih let tumin nipui bazarah a che na hle. Spanish manager hian a lo thlawnin sum a hmang satliah lo, league match ngaah goal hnih chiah an chhuah a, goal 16 an khung tawh thung - West Brom tan hna a awlsam dawn lo.

Pep-a'n first team player

ṭhen­khat a chawlhtir a rinawm a, chutihrualin captain Vincent Kom­pany-a'n full training a neih tawh avangin Belgium international defender hi chhawr theih a ni tawh ang.

Hawthorns-a an lenluh hnu­hnung berah City hi 4-0 in an chak, striker Sergio Aguero leh Ilkay Gundogan ten goal hnih ve ve an khung. Germany midfielder Gundogan hi a khup hliam dam tawhin Watford a hmachhawn thei tawh - Gun­dogan hian minute 90 inkhel tura a inpeih tawh thu a sawi, tun season-a a vawi khat nan bul a ṭan beisei a ni.

Chak mamawh Arsenal

Arsene Wenger-a'n League Cup chu player naupang leh first team lama inlan tam phak lote khelhtir nan a hmang ṭhin, tun thlengin a zia a la thlak lo. Champions League an khelh phak loh avangin Gunners leh Wenger hian sawisel an hlawh a, season bul an ṭan chhiat avangin manager hian dem a hlawh zual bawk - eng inelna pawh ni se Wenger tan chak a ngai.

League lama chhawr rim loh Mohamed Elneny, Olivier Giroud leh David Ospina te bakah Jack Wilshere te an inlan thei dawn a, hliam vangin Mesut Ozil leh Danny Welbeck te an chawl mek thung. Gunners hi an khelmuala khel tur an ni a, tun hma lama vawi sarih an hneh tawh Doncaster lakah harsa vak loa chak tura ngaih an ni.