Vanglaini Biangbiakna ; Olympic beiseitu Mizo rawlthar Jeremy

Ṭhianho zinga ṭha bik nih a awlsam lo a, veng leh mahni khaw tana mi bik leh filawr nih pawh thil harsa tak a ni. Mipui tluklehdingawn chuang chenna India rama Indian Weightlifting Federation lamin khawvel deng chhuak thei tura an beisei chu Govt. Complex rawlthar Jeremy Lalrinnunga a ni.

A naupan leh a pumrua a la len tawk loh avanga boxing khel ve hleithei lo khan tunah chuan Weightlifting huangah India tan medal a chawi chhuak ta nual. Mizo rawlthar duhawm hian a hriselna a ṭhat a, a beisei anga training a nei chhunzawm thei a nih ngat chuan Tokyo Olympic lama inlan a beisei thu Vanglaini a hrilh.

Hmanah chuan

Mizoram aiawha chhak fo tawh ṭhin boxer Lalneihtluanga fapa Jeremy hian a naupan tet laia a pa hnung zuiin a ṭhiante zinga boxing a khel ve ṭhin, a kum a la naupan em avangin tournament erawh a khel hman lo. Boxing aṭangin kum 2011 khan a tana khuanu ruat lawk weightlifting a luhchilh ta zawk.

Mizoram Weightlifting Association chuan kum 2011, October thla khan Govt. Complex-ah Weightlifting Academy State Sports Coaching Centre a din a. He hmunah hian Weightlifting coach Malsawma Khiangte (SYS) kaihhruaina hnuaiah Govt. Complex rawlthar Jeremy hian a zinkawng bul a ṭan.

A tir aṭangin theihna an neih ṭhat zia a lang chho nghal a, kum khat pawh a liam hmain a theihna tipung turin Mizoram a chhuahsan. Cricket atchilhna ram, mipui tam zawkin football an ngainatna hmun Mizoram aṭanga ritchawi luhchilhtu Jeremy theihna san zia chu hun rei lote chhungin hmuh chhuah sak a ni a, kawng thui zawk a zawh theih nan Pune lamah hruai thlak a ni.

Kum 2012 April thla khan Army Boys, Pune-a training turin a tling a, he hmunah hian kum naupangte ni chungin foreign coach Gubala Slovakia leh Army coach Zarzokima te kaihhruaina hnuaiah an intuaihriam chhunzawm.

Jeremy-a pa Lalneihtluanga chuan, "A kal dawn khan a kum a la naupang si a, zinkawng hautak a zawh dawn tih ka hriat avangin ka theihtawpin ka fuih a, a nu Lalmuanpuii pawh hian a theih ang angin phone aṭangin a fuih reng bawk," tiin an fapa chungchang a sawi.

Training hau tak

Ṭhalai ṭhenkhat, mut nachang hre lo leh thawh nachang hre lo tia sawi hlawh an awm. Infiamna khawvela hlawhtling tur erawh chuan taksa tana ṭha tur ngaihtuah a ngai thung. Jeremy hi training an neih chinah zan a mengrei ngai lo a, dar 10:00-ah a mu ṭhin. Zingah dar 7:00-8:30 chhung training neiin chhunah school an kal a, tlaiah dar 4:30-6:00 chhung training an nei zui leh ṭhin a ni.

International medal panga la tawh Jeremy chuan, "Ṭhalai nih chuan thil tih châk tam tak kan nei ve a, mahse ka training tibuai thei thil a nih chuan ka kalsan ngam," tiin weighlifting tibuai turin thildang chu an len tawk loh thu a sawi.

Jeremy pa chuan a fapa chungchang sawiin, "Theihna nei sang fal a ni bikin ka hre lo, a tir aṭanga hlawhtlinna a chan theih chhan chu thu a awih em vang a ni. A hun takah zel tih tur a ti a, hotu ten a ṭhatna tur kawng an kawhhmuh chu lawm takin a zui thei a ni. A taksa tan ṭha lo tur ruihtheih thil lakah a filhim vek bawk," tiin a sawi.

Natna karah

Mi hlawhtling leh chhuanawm tak takte hian dinhmun sang tak an thlen theih nan harsatna leh hrehawmna an paltlang hmasa chawk. Jeremy tan pawh national medal hmasa ber la turin a awlsam bik lo, a awma hliam hmun riat zeta chilhna awm chungin inelna a hmachhawn.

Jeremy chuan, "Ka ṭhianpa nen kan infiamna lamah ka awmah mi ti palh a, hmun riatah chilh a ni. Kan hotuten hliam nei chungin inelna hmachhawn an phal lo. Ka hliam dam hnuah thla khat vel chiah training-na hun ka nei zui a, medal hmasa ber ka la thei kha ka vannei hle a ni," tiin Vanglaini a hrilh.

State level intihsiakna a hmachhawn lo a, inelna puitling a hmachhawn hmasak chu Youth National Weightlifting Championship 2016 niin gold medal a dawng nghal a, he inelna bikah hian snatch-ah 90 kg chawiin India record thar a siam nghal a ni.

National medal a lak hnuah pawh Jeremy tan kawng a mam purh bik lo, a hrisel tawk lo a, damlohna hrang hrangin a tlakbuak fo avangin hawtir an tum hman hial. Mahse, tumruh leh huaisen taka harsatna a paltlang ngam miau avangin tun hun hi a thleng.

Hmachhawp Olympic

Nakkumah Asian Championship a awm dawn a, he huna India chetṭhat dan a zirin Youth Olympic Games-a inlan turin ticket a awm thei dawn, kum bithliah inelna lama sulhnu nei ṭha tan 2020 Summer Olympic Games hi beisei theih a ni.

Hmathlir chungchang sawiin Jeremy chuan, "Olympic khelh ngei ka tum a, ka tum a hlawh tlin theih nan ka taksa leh rilru zawng zawng ka hlan dawn. Mizoram chu ngai viau ṭhin mah ila training kan neih ngawrh em avangin ka rawn haw tawh mai mai lo ang," a ti.

Bengaluru lama inbengbel Go Sports Foundation chuan Jeremy hi kum 2020 thleng inremna an neihpui a, ei leh in, thuamhnaw leh inenkawlna zawng zawng an tumsak vek. Indian Weightlifting Association lam pawhin amahah beiseina an neih san avangin Tamil Nadu rawlthar M Raja nen kum 2020 thleng chu chawl loin training an pe chhunzawm dawn a ni.

Jeremy Lalrinnunga Sulhnu
International Championship
# Tournament A hmun Medal
1 IWF World Youth Weightlifting Championship 2016 Malaysia Silver
2 Commonwealth Youth Weightlifting Championship 2016 Malaysia Gold
3 Asian Youth Weightlifting Championship 2016 Japan Silver
4 IWF World Youth Weightlifting Championship 2017 Thailand Silver
5 Commonwealth Youth Weightlifting Championship 2017 Australia Gold
National Championship
# Tournament A hmun Medal
1 11th Sub-Junior Boys & Girls Weightlifting Championship 2016 Bihar Gold
2 12th Sun-Junior Boys & Girls National Weightlifting Championship 2016 Gold
3 North East Games 2016 Manipur Gold
4 53rd Men and 29th Women Junior National Weightlifting Championships Odisha Gold