Dinthar an phur thar

Mizoram Premier League hmasa ber champion Dinthar FC-in MPL6-ah chak hmel hmu turin Mizoram Police 3-2 in an hneh a, Dinthar mipui Lammualah an zai rual leh ta.

Thawhṭanni zan inkhel hmuh­nawm takah Police-in Lalram­tharmawia penalty hmangin hma an hruai a, Dinthar lamin Lalbiakhlua hmanga an chhanlet hnuah R. Lalthantluanga leh Jackson Victor hmangin an khung belh. Maimawms-in an chance ṭha neih an hlah nual a, Police tan Hualngohmun tlangval Mamawitea bawkin penalty aṭanga a khung avangin hun tawp thlengin inkhel a hmuhnawm.

Police an ral?

MPL club paruk zingah Mizoram Police-in training an ṭan hmasa ber a, MPL ṭan a nih meuh chuan an ṭhat lai ber an kal pel tawh niin a lang. MFA Super Cup-a semifinal an thlen hnuah Police-in I Day Football group stage an patlang thei lo a, MPL6-ah chak hmel an la hmu lo.

Dinthar FC defender Mal­sawma Chhangte handball zarah Police-in penalty hmangin hma an hruai a, fitness nei ṭha ber tura lang team hian minute 90 an daih ṭhin lo. Maimawms-in Armed Veng tlangval Hlutea hmanga an siphurh an sut hnuah goal chance ṭhahnem tak neiin vawi hnih dang bak an khung tawh lo.

Police goal nawr a na tawk lo a, amaherawhchu Maimawms defender Lalnunpuia kutin ball a fuh zarah a vawi hnih nan penalty an hmu a, Mamawitea'n khung nawn mah se point hmu turin goal dang a khung belh tawh lo. Ṭialthawnga kaihhruai team hian September 21, Ningani tlaiah anmahni ang bawka chak hmel hmu lo Aizawl FC an hmachhawn dawn a, inkhel hmuhnawm tak a ni ang.

MPL kai thar Police hian Santosh Trophy hnuhnung ber­ah Mizoram tan player paruk Lalhmunmawia, Lalram­tharmawia, Lalfakzuala, Lal­biakhlua, Lalsangbera leh F Lalrinpuia te thawhin an thawh hnem ber a, I League-a Aizawl FC champion team zinga mi V. Lalṭanpuia an nei let tawh bawk.

MPL6-ah match li chauh khelh a la ni nachungin Police hi tlak hlauhawmah an ding der tawh a, insiamṭhatna hun erawh an la nei. Club dang aia training an ngah chunga an result a ṭha si lo a nih chuan an kalphung pawh an ennawn a ṭul ang.

Malsawm ruah

Dinthar FC-in goal an phur hmasa zawk chungin an zam phah lo a, chakna hmahruai thlentu chu Dinthar mipui an ni. K. Kawla Stand-a ṭhu Maimawms te thawm chu ruah sur nasa tak karah pawh a ring pha a, Dinthar player an phur phah hle.

Nigerian forward Jackson Victor chu khel­mual chhungah a langsar a, Police defender pawi­mawh Ahmuntea inhliam an vanneih pui bawk. Dinthar winger David Tlau-a'n Nigerian forward siam sak chu yard ruk vel lek aṭanga a hlah hnuah Zemabawk tlangval David-a hian first half injury time-ah Jackson-a tan ball fing zet a pe a, Nigerian forward ball tih per chu Hlutea'n mawi zetin a khung.

Second half-ah Jackson a tal na chhunzawm a, Lalmama goal khung tur a siam sak hnuah ama pualin a khung leh bawk. Police-in Nigerian for­ward dan ngaihna an hre lo a, amaherawhchu Din­thar tlarhma finishing a ṭha tawk lo. Mai­mawms-in an tlarhnung an rem phui hret a, Nigerian striker Jack­son-a a chet ṭhat chhun­zawm a, Dinthar mipuiin an ṭawiawm ṭhat reng chuan Lalhlupuia Sailo hote hi team ṭha zingah chhiar tel an ni ang.